CƏMİYYƏT
Azərbaycanın dövlət sərhədini pozduqları üçün 25 nəfər saxlanılıb VİDEO
Bakı, 6 fevral, AZƏRTAC
Dövlət Sərhəd Xidməti (DSX) tərəfindən 2015-ci ilin yanvar ayı ərzində dövlət sərhədinin etibarlı mühafizəsi istiqamətində məqsədyönlü tədbirlər həyata keçirilib, qaçaqmalçılığa, qeyri-leqal miqrasiyaya, narkotik vasitələrin qeyri-qanuni dövriyyəsinə qarşı mübarizə uğurla davam etdirilib.
Dövlət Sərhəd Xidmətinin mətbuat mərkəzindən AZƏRTAC-a bildiriblər ki, ay ərzində dövlət sərhədini pozduqları üçün 24 halda 25 nəfər saxlanılıb. Onların 12-si Azərbaycan Respublikası, 5-i Özbəkistan, 2-si İran, ikisi Türkiyə, 2-si Tacikistan və ikisi Şri-Lanka vətəndaşı olub.
Sərhəd rejim qaydalarını pozarkən yaşıl sərhəddə 11 halda 17 nəfər, Xəzər dənizində 4 halda 6 nəfər saxlanılaraq barələrində müvafiq tədbir görülüb.
Cinayətkarlığa qarşı mübarizə tədbirləri nəticəsində Azərbaycan Respublikasının hüquq mühafizə orqanları tərəfindən axtarışda olan 222 nəfər aşkarlanaraq aidiyyəti orqanlara təhvil verilib.
Narkotik vasitələrin qeyri-qanuni dövriyyəsinə qarşı mübarizə tədbirləri nəticəsində 17 halda 15 kiloqram 242 qram narkotik maddənin dövlət sərhədindən keçirilməsinin qarşısı alınıb.
Yanvarın 2-də Cəlilabad rayonunun Dələli kəndi ərazisindəki zastavanın xidməti sahəsində əməliyyat məlumatı əsasında həyata keçirilən tədbirlər nəticəsində 4 kiloqram 100 qram tiryək aşkar olunaraq götürülüb.
Yanvarın 8-də keçirilən əməliyyat tədbiri nəticəsində Cəlilabad rayonu ərazisində Masallı rayon sakinləri - 1973-cü il təvəllüdlü Cəbrayılov Ehtiram Vətən oğlu və onun həyat yoldaşı, 1977-ci il təvəllüdlü Cəbrayılova Aynurə Tahir qızı “VAZ-2106” markalı Az 10-CP-311 dövlət qeydiyyat nömrəli avtomobildə saxlanılıblar. Avtomobilə baxış zamanı yük yerindən ümumi çəkisi 3,5 kiloqram tiryək aşkar edilib.
Yanvarın 22-də “Yalama” sərhəd nəzarət məntəqəsində Astara rayon sakini, 1986-cı il təvəllüdlü Hüseynov Tural Rəhman oğluna məxsus əl yükünə baxış keçirilərkən 6 kiloqram həşiş qətranı aşkarlanıb.
Ay ərzində “Biləsuvar” sərhəd nəzarət məntəqəsində 5 halda 903 qram, “Astara” sərhəd nəzarət məntəqəsində 6 halda 653 qram narkotik vasitənin dövlət sərhədindən keçirilməsinin qarşısı alınıb.
Qaçaqmalçılıqla mübarizə çərçivəsində həyata keçirilmiş tədbirlər nəticəsində 66 halda ümumi dəyəri təqribən 734 min manat olan qaçaqmalın, o cümlədən 2 “F-1” əl qumbarası, 1 tüfəng, 1 pnevmatik tapança, 1 travmatik tapança, travmatik tapança üçün 65 ədəd patron və 1 daraq, 10 ədəd 7,62 millimetrlik patron, 67 kiloqram barıt, 1 kiloqram qırma, 10 ədəd 16 millimetrlik giliz, 1 beşbarmaq, 2 ədəd elektro-keyləşdirici, 420.800 ABŞ dolları, 250 qram qızıl-zinət əşyaları, 40 ədəd kombi, 220 təzyiqölçən cihaz, 2 qayıq, 176 mobil telefon, 4245 qutu müxtəlif markalı siqaret, müxtəlif dərman preparatları, ərzaq və sənaye malları saxlanılıb.
Dövlət sərhədlərimizin etibarlı mühafizəsinin təşkili istiqamətində tədbirlər davam etdirilir.