Yevlax, 29 noyabr, AZƏRTAC

Azərbaycanda son illər həyata keçirilən iqtisadi siyasətin prioritet istiqamətləri olan qeyri-neft sektorunun inkişafının sürətləndirilməsi, regionların tarazlı inkişafı, bu sahədə qəbul edilən Dövlət proqramları, əlverişli biznes və investisiya mühitinin formalaşdırılması sayəsində ölkənin bölgələrində davamlı sosial-iqtisadi tərəqqiyə nail olunub.

Regionların sosial-iqtisadi inkişafına dair Dövlət proqramlarının uğurlu icrası nəticəsində ölkəmizin bütün bölgələrində olduğu kimi, Yevlax rayonunun da iqtisadiyyatı dinamik inkişaf edib. Yevlax şəhərində və rayonun kəndlərində genişmiqyaslı yenidənqurma və tikinti-quruculuq işləri həyata keçirilib, yeni sənaye obyektləri yaradılıb, əhalini narahat edən problemlərin həlli və infrastruktur layihələrinin yerinə yetirilməsi sahəsində mühüm işlər görülüb.

Dövlətimizin başçısının diqqət və qayğısı, regionların sosial-iqtisadi inkişafına dair Dövlət proqramlarının uğurlu icrasının nəticəsidir ki, son 10 ildə rayonda ümumi məhsul buraxılışı 5,8 dəfə artıb. Rayonun iqtisadi göstəricilərinin yüksəlməsində sahibkarlığın inkişafı, kənd təsərrüfatı, qida və sənaye məhsulları istehsalına yönəldilən investisiyaların çoxalması, yeni istehsal, emal və xidmət obyektlərinin tikilməsi mühüm rol oynayır. Son illərdə rayonda “Lalə-tekstil” MMC tikiş fabriki, “Dan” kərpic, “Gilan” dəri emalı, “Yevlax Qida” MMC zavodları, “Arfa” mebel fabriki, “Yevlax-Beton” ASC dəmir-beton zavodu, asfalt istehsal edən müəssisələr, “Karvan -K” MMC konserv zavodu, “Azərtoxum” MMC toxum emalı müəssisəsi, makaron və çörək sexləri fəaliyyətə başlayıb. Kolanı kəndində istixana kompleksi yaradılıb, Aran qəsəbəsində üzüm bağları salınıb. Növbəti illərdə keramikadan və gipsdən müxtəlif məmulatlar (tikinti və məişət) istehsalı sahələrinin, məişət tullantıları və çörək zavodlarının yaradılması nəzərdə tutulur.

Aparılan genişmiqyaslı tikinti-quruculuq işləri nəticəsində son 10 ildə Yevlax şəhərinin siması tamamilə dəyişib, özünəməxsus gözəlliyi ilə seçilən bir şəhərə çevrilib. Yevlax şəhərinin prospekt və küçələri müasir üslubda yenidən qurulub, yollara asfalt örtük salınıb, işıqlandırma sistemləri quraşdırılıb, binaların dam örtüyü dəyişdirilib, fasad hissəsi müasirləşdirilib. Şəhərin mərkəzində dahi rəhbərin abidəsi ucaldılıb, Heydər Əliyev Mərkəzi, Ulu Öndərin adını daşıyan saray, 180 çarpayılıq rayon mərkəzi xəstəxanası, uşaq xəstəxanası, regional vərəm dispanseri, əlillərin reabilitasiya mərkəzi, gigiyena və epidemiologiya mərkəzi, Gənclər evi, elektron kitabxana, tarix-diyarşünaslıq muzeyi, xalq teatrı, şahmat məktəbi, məhdud fiziki imkanlı insanlar üçün Regional İnformasiya Mərkəzi, 6 min yerlik şəhər stadionu, bayraq meydanı, avtovağzal kompleksi, 5 kənddə həkim məntəqəsi, 11 poçt binası, Qarabağ müharibəsi əlilləri və şəhid ailələri üçün 116 mənzilli 5 ədəd çoxmərtəbəli bina, şəhərdə 31 idarə, müəssisə və təşkilat üçün inzibati binalar tikilib istifadəyə verilib, hava limanı yenidən qurulub, “EL-TV” regional televiziya şirkəti fəaliyyətə başlayıb.

Bu dövr ərzində şəhərin yaşıllaşdırılması diqqət mərkəzində saxlanılıb, əhalinin istirahəti və ekoloji mühitin yaxşılaşdırılması məqsədilə Heydər Əliyev xiyabanı, Nizami, Dostluq, Müstəqillik, Səməd Vurğun, Dədə Qorqud, Gənclik, Bələdiyyə parkları, Uşaq-Əyləncə Mərkəzi salınıb, Kür çayı sahilində Bulvar İstirahət Kompleksi yaradılıb.

Hazırda şəhərin Kür çayı sahilindəki hissəsində 5 ulduzlu hotelin, rayon polis şöbəsinin, İqtisadiyyat və Sənaye Nazirliyinin Aran Regional İnkişaf Mərkəzinin, təhsil şöbəsinin, Azərbaycan Beynəlxalq Bankı Yevlax filialının, Kənd Təsərrüfatı Nazirliyi Yevlax rayon idarəsinin, 11 saylı Ərazi Vergilər Departamentinin, Qaz istismar sahəsinin, 100 yerlik uşaq bağçasının binalarının tikintisi davam etdirilir.

Ölkədə həyata keçirilən sosial-iqtisadi siyasətin ən mühüm istiqamətlərindən biri də respublikada avtomobil yollarının inşası və yenidən qurulması, müasir standartlara cavab verən nəqliyyat sisteminin yaradılmasıdır. Son illər Yevlax rayonunda da avtomobil yollarının yenidən qurulması istiqamətində mühüm işlər görülüb. Dövlət Proqramına əsasən, rayonun 20 kəndinin 57,8 kilometr giriş yolları əsaslı surətdə yenidən qurularaq asfaltlanıb. Əhalisinin sayı 8000 nəfər olan 11 kəndi birləşdirən, uzunluğu 25 kilometr olan Səmədabad-Qaraməmmədli-Qaramanlı-Köyük avtomobil yolunda əsaslı təmir işləri davam etdirilir. Yolun 19 kilometrlik hissəsinin tikintisi başa çatdırılıb. Rayon ərazisindən keçən 129,5 kilometr respublika əhəmiyyətli avtomobil yolunun 98 kilometri yenidən qurulub. Kür, İncə çayları və kanallar üzərində 10 ədəd körpü tikilib. Hazırda Aran qəsəbəsində Bakı-Ələt-Qazax avtomobil yolunun üzərində avtomobil körpüsünün tikintisi aparılır, Kür çayı üzərində uzunluğu 5 aşırımlı dəmir yolu körpüsünün əsaslı təmiri və bərpası davam etdirilir.

Bütün bölgələrimizdə olduğu kimi, Yevlax rayonunda da məktəblərin maddi-texniki bazasının möhkəmləndirilir, təhsil ocaqları üçün yeni binalar tikilir, mövcud məktəblər təmir olunur. Son 10 ildə rayonda 5038 şagird yerlik 21 məktəb binası tikilib. 11 məktəb binasında əsaslı təmir işləri aparılıb.

Hazırda Yevlax rayonunda bütün qüvvələr “Azərbaycan Respublikasının regionlarının 2014-2018-ci illərdə sosial-iqtisadi inkişafı Dövlət Proqramı”nda nəzərdə tutulan tədbirlərin icrasına səfərbər edilib.

Dövlət Proqramında əsasən rayonda qeyri-neft sənaye sahələrinin, o cümlədən keramikadan və gipsdən hazırlanmış məmulatlar (tikinti və məişət) istehsalı sahələrinin yaradılması, cins heyvandarlıq, ətlik istiqamətli quşçuluq, taxılçılıq, pambıqçılıq, toxumçuluq, tərəvəzçilik və meyvəçilik sahələrinin inkişafı, yerli əhəmiyyətli avtomobil yollarının, təhsil, səhiyyə, mədəniyyət, idman-sağlamlıq obyektlərinin tikintisi və təmiri, rayonun elektrik enerjisi, istilik və qaz təchizatının, rabitə xidmətinin, Yevlax şəhərinin su təchizatı və kanalizasiya sistemlərinin yaxşılaşdırılması sahəsində işlərin davam etdirilməsi nəzərdə tutulur.

Regionların inkişafını daim diqqət mərkəzində saxlayan Prezident İlham Əliyevin son 10 ildə Yevlaxa 8 dəfə səfər etməsi, rayonun sosial-iqtisadi inkişafının sürətləndirilməsi barədə imzaladığı sərəncamlar şəhərin müasir inkişaf dinamikasını şərtləndirən əsas amillərdəndir. Dövlətimizin başçısının səfərlərindən birində dediyi “Çox şadam ki, Yevlax çox sürətlə inkişaf edir və rayonun gələcək inkişafı ilə bağlı əlavə tədbirlər görüləcəkdir” sözləri yevlaxlıların qurub-yaratmaq həvəsini daha da artırıb. Əminliklə demək olar ki, yevlaxlılar bütün qüvvələri səfərbər edərək üçüncü Dövlət Proqramında nəzərdə tutulan tədbirlərin uğurla icra olunmasına, doğma şəhərlərinin daha da çiçəklənməsinə öz töhfələrini verəcəklər.

Tahir Ağaməmmədov

AZƏRTAC-ın müxbiri