Azərbaycanın Rus İcmasının sədr müavini: Heydər Əliyev tolerant çoxmillətli cəmiyyətin banisidir
Bakı, 9 sentyabr, AZƏRTAC
Azərbaycan xalqının Ümummilli Lideri Heydər Əliyev tolerant çoxmillətli cəmiyyətin banisidir. 1993-cü il iyunun 15-də Milli Məclisin iclasında çıxış edən Heydər Əliyev deyib: “Onillilkər və yüzilliklər boyunca Azərbaycan bu torpaqda yaşayan bütün insanların vətəni olub və bundan sonra da onların vətəni olaraq qalmalıdır”. Məhz bu sözlər sonralar güclü və müstəqil Azərbaycanın inkişafının əsaslarından biri oldu.
AZƏRTAC xəbər verir ki, bu barədə Azərbaycanın Rus İcması sədrinin birinci müavini Anastasiya Lavrina icmanın Respublika şurasının şənbə günü keçirilən iclasındakı çıxışında bildirib. Tədbir Azərbaycan xalqının Ümummilli Lideri Heydər Əliyevin anadan olmasının 100 illiyinə və Azərbaycanın Rus İcmasının yaradılması və fəaliyyətinin 30 illiyinə həsr olunmuşdu.
“Çətin 90-cı illərdə məhz Heydər Əliyev rusları Azərbaycanı tərk etməməyə inandırmaq üçün lazım olan sözləri tapmağa nail oldu. O, Rus icmasının yaradılmasının başlanğıcında dayanıb və məhz Ümummilli Lider sayəsində bu gün 120 mindən çox üzvü olan Azərbaycanın Rus İcması Cənubi Qafqazda ən böyük icmadır. Sonralar multikulturalizmin dəyəri Ümummilli Liderin layiqli davamçısı olan Azərbaycan Prezidenti İlham Əliyevin müstəqil siyasətinin mühüm seqmentinə çevrilib”, - deyə icma sədrinin müavini vurğulayıb.
Onun sözlərinə görə, Mixail Zabelinin sədrliyi ilə Rus icması otuz il ərzində çox böyük iş görüb, lakin, ən əsası, biz tarixi vətən haqqında xoş xatirəni yaddaşlarda qoruyub saxlayaraq, çoxmillətli Azərbaycan cəmiyyətinin tamhüquqlu hissəsi olmağa nail ola bildik. “Son zamanın bütün çağırışlarına baxmayaraq, Azərbaycan və Rusiya arasında münasibətlərin yüksələn xətlə möhkəmləndiyini müşahidə etməyə şadıq. Mehriban qonşuluq, yüksək mənəviyyat, qarşılıqlı hörmət Azərbaycan və Rusiya arasında möhkəm və uzunmüddətli əməkdaşlığın əsasıdır”, - deyə Anastasiya Lavrina qeyd edib.
O xatırladıb ki, 2021-ci ildə Azərbaycan Respublikasının Prezidenti İlham Əliyevin təşəbbüsü ilə ölkəmizin gözəl mədəniyyət paytaxtı Şuşa şəhərində “Multikulturalizm Azərbaycan musiqisində” mövzusunda yenidən “Xarıbülbül” musiqi festivalı təşkil olunub və orada ölkəmizdə yaşayan müxtəlif xalqların musiqi yaradıcılığı təqdim edilib. Bu, Azərbaycanın milliyyəti və dinindən asılı olmayaraq hər kəsin vətəni olduğu və hər bir vətəndaşın bu torpaq uğrunda mübarizə aparmağa hazır olduğunun rəmzinə çevrildi.
“Mayın 8-də Şuşada çıxış edən Prezident İlham Əliyev deyib ki, Azərbaycanda bütün xalqların, bütün konfessiyaların nümayəndələri bir ailə kimi yaşayırlar. Bu unikal mühit bu gün ölkəmizi gücləndirir… Biz vahid xalqıq və hər zaman çalışacağıq ki, hərəkətlərimiz multietnik, multimilli cəmiyyətimizin inkişafının xeyrinə yönəldilsin.
Bölmənin digər xəbərləri
