Azərbaycanın və Monteneqronun Ombudsman təsisatları arasında təcrübə mübadiləsi təşkil olunub
Bakı, 3 oktyabr, AZƏRTAC
İnsan hüquq və azadlıqlarının səmərəli müdafiəsi sahəsində bilik və bacarıqların artırılması məqsədilə xarici ölkələrin ombudsman təsisatları ilə təcrübə mübadiləsi Azərbaycan ombudsmanının (insan hüquqları üzrə müvəkkil) beynəlxalq əməkdaşlıq sahəsində həyata keçirdiyi əsas fəaliyyət istiqamətlərindən biridir.
Azərbaycanın Ombudsman Aparatından AZƏRTAC-a bildirilib ki, belə təcrübə mübadilələrindən biri də bu günlərdə Monteneqronun Ombudsman təsisatı ilə birgə təşkil olunub.
Ayrı-seçkiliyin qarşısının alınması və hüquq bərabərliyinin təmini sahələrində təcrübə mübadiləsi aparmaq məqsədilə Azərbaycanın Ombudsman Aparatının bir sıra əməkdaşları - Cavidan Qorçiyev, Vəfa Verdiyeva, Sevinc Şener, Fərqanə Məmmədxanova, Pərvin Rəhimov və Mikayıl Bayramov Monteneqronun Budva şəhərində “Monteneqro və Azərbaycanın Ombudsman təsisatları perspektivindən ayrı-seçkiliyin qarşısının alınmasına dair təcrübələr” mövzusuna həsr olunmuş təlimdə iştirak ediblər.
Tədbirin əsas məqsədi ayrı-seçkiliyin qarşısının alınması, gender bərabərliyi, qadınlara qarşı zorakılıq və məişət zorakılığı, əlilliyi olan şəxslərin hüquqlarının müdafiəsi, bərabərlik hüququnun təmini və Ombudsman təsisatlarının bu sahədəki fəaliyyətinin gücləndirilməsi istiqamətində Monteneqro təcrübəsi ilə tanışlıq, eləcə də iki ölkə arasında səmərəli təcrübə mübadiləsini təşviq etmək olub.
Təlim çərçivəsində keçirilmiş plenar sessiya və panellərdə insan hüquqlarının müdafiəsi sahəsində Ombudsman təsisatlarının genderəsaslı zorakılığa, nifrət nitqinə qarşı mübarizədə rolu, beynəlxalq mexanizmlərin tətbiqi, əlilliyi olan şəxslərin bərabər imkanlara çıxışı, məlumatların toplanması və hesabatların hazırlanması, ictimaiyyət və media ilə əməkdaşlıq, eləcə də risk qrupundakı şəxslərə proaktiv yanaşma kimi bir sıra aktual mövzular üzrə fikir mübadiləsi aparılıb.
Bundan əlavə, nümayəndə heyəti proqram çərçivəsində Monteneqronun İnsan Haqları və Azlıqların Hüquqları üzrə Nazirliyini ziyarət edərək, onların xüsusilə gender bərabərliyi və həssas qrupların hüquqlarının müdafiəsinə dair həyata keçirdikləri fəaliyyətlə tanış olub.
Yekunda mövzu üzrə interaktiv fikir mübadiləsi aparılıb və iştirakçıları maraqlandıran suallar cavablandırılıb.
Bölmənin digər xəbərləri
