Bakı, 27 oktyabr, AZƏRTAC

Azərbaycanın Enerji Məsələlərini Tənzimləmə Agentliyi (AERA) və Türkiyənin Enerji Bazarlarını Tənzimləmə Qurumu (EPDK) arasında əməkdaşlıq protokolu imzalanıb.

AERA-dan AZƏRTAC-a bildirilib ki, sənəd Azərbaycan və Türkiyənin enerji tənzimləmə sahəsində əməkdaşlığının genişləndirilməsi məqsədilə iki qurum arasında bu gün keçirilmiş onlayn görüş zamanı imzalanıb. Türkiyənin Enerji Bazarlarını Tənzimləmə Qurumunun prezidenti Mustafa Yılmaz, vitse-prezidentlər Hacı Ali Ulutaş, Hamdi Bildirici və qurumun digər rəhbər şəxslərinin iştirakı ilə keçirilən onlayn görüşə Azərbaycan tərəfdən Enerji Məsələlərini Tənzimləmə Agentliyinin sədri Samir Axundov, sədr müavinləri Rövşən İsmayılov, Ramin Babayev və digər nümayəndələr qatılıblar.

EPDK-nın prezidenti M.Yılmaz rəhbərlik etdiyi qurumun Türkiyənin enerji bazarında 19 ildir ki, fəaliyyət göstərdiyini bildirib. Türkiyənin həmişə Azərbaycanın yanında olduğunu deyən M.Yılmaz Azərbaycanın enerji tənzimləyicisi ilə əməkdaşlığın hər sahədə inkişaf etdirilməsi və sıx işgüzar əlaqələrin qurulması istiqamətində hərtərəfli dəstəyin veriləcəyini diqqətə çatdırıb.

AERA-nın idarə heyətinin sədri S.Axundov öz növbəsində Türkiyə nümayəndə heyətini salamlayıb, rəşadətli Azərbaycan Ordusunun əks-hücum əməliyyatına başlayaraq işğal altında olan torpaqlarımızın azad olunduğunu türkiyəli həmkarların diqqətinə çatdırıb. O, qardaş Türkiyə Respublikasının əməliyyatların ilk günündən Azərbaycana dəstəyinə görə türk xalqına təşəkkürünü bildirib.

S.Axundov enerji təhlükəsizliyinin Azərbaycanın iqtisadi təhlükəsizliyinin ən vacib elementlərindən biri olduğunu vurğulayaraq qeyd edib ki, bundan əvvəl Azərbaycan Respublikasının Energetika Nazirliyi və Türkiyə Respublikasının Energetika və Təbii Sərvətlər Nazirliyi arasında münasibətlər çox uğurla inkişaf etdirilib.

“Görüşün məqsədi iki qurum arasında əməkdaşlığın təməlini qoymaq və onu hərtərəfli inkişaf etdirmək, həmçinin energetika və kommunal xidmətlər sahəsi, rəqabətli enerji bazarı, enerji səmərəliliyi sahələri üzrə Türkiyənin təcrübəsi ilə tanış olmaq, eyni zamanda, bu sahədə təcrübə mübadiləsi aparmaqdır. Biz ümid edirik ki, əməkdaşlıq ümumi maraqlara cavab verən prioritetlərin reallaşmasına və enerji tənzimləmə sahəsində islahatların aparılmasına töhfə verəcək”, - deyə o qeyd edib.

Əməkdaşlıq protokolunda elektrik enerjisi və təbii qaz təchizatı sahəsində dayanıqlı tənzimləmə bazasının yaradılması, enerji bazarının inkişafı üçün seminarlar, ikitərəfli görüşlər, təlimlər, mütəxəssis və təcrübə mübadiləsi, regional enerji bazarlarının yaradılması baxımından milli, regional və beynəlxalq qurumlarla əməkdaşlıq kimi məsələlərin həyata keçirilməsində AERA və Enerji Bazarlarını Tənzimləmə Qurumu ilə əməkdaşlıq öz əksini tapıb. Həmçinin sənəddə Türkiyənin Enerji Bazarlarını Tənzimləmə Qurumu ilə enerji tənzimləməsinin inkişafı sahəsində ikitərəfli məsləhətləşmələrin təşviqi və ikitərəfli münasibətlərin daha da genişləndirilməsi nəzərdə tutulur.

Görüş zamanı EPDK-nın Beynəlxalq əlaqələr şöbəsinin müdiri Mehmet Kürkçü Türkiyənin enerji tənzimləyicisi haqqında təqdimatla çıxış edib, qurumun fəaliyyəti barədə ətraflı məlumat verib.

Görüş iştirakçılarına AERA-nın fəaliyyətinə dair məlumat verilib. AERA-nın Hüquqi təminat və təhlil şöbəsinin müdiri Fariz Şirinovun təqdimatı agentliyin fəaliyyət istiqamətləri, tənzimləyici tərəfindən hazırlanmış mühüm qanun layihələrini və normativ aktları, Avropa Yenidənqurma və İnkişaf Bankının dəstəyi ilə həyata keçirilən layihəni, beynəlxalq əməkdaşlıq haqqında məlumatları əhatə edib.