SİYASƏT
Azərbaycanlı neftçiyə Yakutiyada fəxri ad verilmişdir
Moskva, 5 mart (AZƏRTAC). Saxa (Yakutiya) Respublikasının prezidenti Yeqor Borisovun fərmanına əsasən həmyerlimiz, Sibir neftini kəşf edənlərdən biri, neft və qaz sənayesinin veteranı Rafiq Qafarova “Saxa (Yakutiya) Respublikasının Əməkdar Xalq Təsərrüfatı İşçisi” fəxri adı verilmişdir. Həmyerlimiz bu fəxri ada Saxa (Yakutiya) “Neft və qaz sənayesi sahəsində xidmətlərinə, respublikanın sosial-iqtisadi inkişafına verdiyi töhfəyə və çoxillik vicdanlı əməyinə görə” layiq görülmüşdür.
Hazırda Moskvada yaşayan R.Qafarov Bakıda anadan olmuş, Azərbaycan Neft və Kimya İnstitutunu bitirmişdir. 30 ildən çox Yakutiyada işləmiş, qazmaçı köməkçisindən başlamış “Yakutburnefteqaz” dövlət müəssisəsinin baş direktoru vəzifəsinə qədər əmək yolu keçmişdir. Haqlı olaraq, Yakutiyada neft və qazı kəşf edənlərdən biri sayılan Rafiq Qafarov Yakutiya neftçiləri arasında böyük nüfuz sahibidir. O, öz maraqlı bioqrafiyasını “Yakutiyalı azərbaycanlı” adlı kitabda təsvir etmişdir. R.Qafarov 2000-ci ildən Ümumrusiya Azərbaycanlılar Konqresinin Mərkəzi Şurasının üzvü, Dünya Xalqlarının Mənəvi Birlik Beynəlxalq Akademiyasının akademiki, Azərbaycan Yazıçılar Birliyinin üzvüdür.
Asya Hacızadə
AZƏRTAC-ın xüsusi müxbiri
Moskva