AZƏRBAYCANLI RƏSSAMLARIN ALMANİYADA SƏRGİSİ KEÇİRİLƏCƏK
Alman-Azərbaycan İqtisadi Yardım İttifaqı idarə heyətinin üzvü, tənqidçi-jurnalist Mixael Nosiadek AZƏRTAC-ın müxbirinə demişdir ki, həmin sərgidə Almaniyanın Azərbaycandakı səfiri, professor Klaus Qrevlix iştirak edəcək, Nordrayn-Vestfaliyanın iş adamlarına Azərbaycan və onun inkişafı haqqında geniş məlumat verəcəkdir. AAİYİ-nin təşəbbüsü ilə Bergkamen meriyasının mədəniyyət şöbəsi azərbaycanlı rəssamların sərgisini təşkil etməyi öz üzərinə götürmüşdür.
Rəssamların əsərləri bir çox beynəlxalq sərgilərdə nümayiş olunmuş, mükafata layiq görülmüşdür. Bergkamenin Sohle-1 qalereyasında açılacaq “İncəsənət-Şərq, Azərbaycanın gənc sənəti” sərgisi həm sənətsevərlər, həm də Azərbaycanın həyatı ilə maraqlananlar üçün yaddaqalan olacaqdır. Sərgiyə himayədarlığı ölkəmizin Almaniyadakı səfirliyi öz üzərinə götürmüşdür. Mədəniyyətləri birləşdirən bu sərgi üçün xeyli vəsait tələb edən daşıma xərclərini Lufthanza AG və Lufthanza Cargo Azərbaycan şirkətləri ödəyəcəkdir. Gələn il bergkamenli rəssamların əsərlərinin Bakıda “Qız qalası” qalereyasında sərgisinin açılması nəzərdə tutulmuşdur.
Bölmənin digər xəbərləri
