“Azərsu” həndbol komandası liderliyini davam etdirir
Bakı, 1 aprel, AZƏRTAC
Qadın həndbolçuların Azərbaycan çempionatında 16-cı tura yekun vurulub.
Azərbaycan Həndbol Federasiyasından AZƏRTAC-a bildirilib ki, günün mərkəzi oyununda “Azəryol” ilə “Qarabağ” komandaları üz-üzə gəliblər. Görüş “Azəryol” komandasının qələbəsi ilə yekunlaşıb - 30:28. Digər oyunda isə “İdman Akademiyası” kollektivi “Gənclər Birliyi”ni 28:26 hesabı ilə məğlub edib.
Xatırladaq ki, tura Mingəçevirdə start verilmişdi. “Kür” Olimpiya İdman Mərkəzinin arenasında keçirilən “Nur” - “Azərsu” matçında qalib müəyyənləşməmişdi - 24:24.
Bu nəticələrdən sonra aktivindəki xalların sayını 27-yə çatdıran “Azərsu” komandası turnir cədvəlində liderliyini möhkəmləndirib. Ondan 5 xal geri qalan “Azəryol” ikinci pillədə qərarlaşıb. Eyni xala malik (hər ikisi 19 xal) “Qarabağ” və “Nur” üçüncü-dördüncü, “Gənclər Birliyi” və “İdman Akademiyası” (hər ikisi 4 xal) isə beşinci-altıncı yerləri bölüşürlər.
Çempionatın 17-ci turunun bütün görüşlərinin aprelin 7-də keçirilməsi nəzərdə tutulub. Tur çərçivəsində “Qarabağ” - “Azərsu”, “Gənclərbirliyi”-“Azəryol”, “İdman Akademiyası”-“Nur” qarşılaşmaları keçiriləcək.
Bölmənin digər xəbərləri
