AZƏRTAC yalan məlumatlar yayan Almaniya KİV-lərini utandırıb
Berlin, 27 avqust, AZƏRTAC
Almaniyanın nüfuzlu mətbuat portalında AZƏRTAC-ın Almaniyadakı xüsusi müxbiri Vüqar Seyidovun açıq məktubu dərc edilib. Müəllif Almaniya KİV-lərində Azərbaycan dövləti haqqında yalan informasiya yayılması və bu ölkəyə qarayaxma kampaniyasını kəskin tənqid edib. Yazıda deyilir:
“Qərb KİV-lərində tez-tez yazırlar ki, guya Azərbaycan “kürü diplomatiyası” aparır. Məsələn, bildirilir ki, guya Azərbaycan 47 ölkəni təmsil edən 318 deputatdan ibarət olan Avropa Şurası Parlament Assambleyasının üzvlərini balıq kürüsü ilə təmin edir, onları Azərbaycana səfərə çağırır. Bu fikirlər çox vaxt Avropa Şurasının 2013-cü il 23 yanvar tarixli qərarı ilə əlaqədar xatırlanır. Həmin qərara əsasən, Parlament Assambleyasının almaniyalı üzvünün Azərbaycan haqqında məruzəsi rədd edilib. Məruzədə Azərbaycanda “siyasi məhbuslar” barədə söhbət gedirdi. Lakin heç bir konkret fakt təsdiqlənmədi. Avropa Şurası 79 səsə qarşı 125 səslə həmin məruzəni rədd etdi. Ən müxtəlif ölkələrdən, o cümlədən Almaniya, İspaniya, İngiltərə, Polşa və digər dövlətlərdən olan deputatlar Azərbaycanın ittiham edilməsinin əleyhinə səs verdilər.
Yəni, doğrudanmı bu 125 deputatın hamısı bir banka kürüyə görə “satılmışdı”? Əgər həmin KİV-lərdə deyildiyi kimi, onlar bir banka ucuz kürü hədiyyəsinə görə “satılırlarsa”, görün Parlament Assambleyasının üzvlərinin siyasi əlitəmizliyi baxımından vəziyyət nə qədər acınacaqlıdır! Sual edilir: Avropa Şurası özü buna necə baxır ki, müxtəlif ölkələrdən olan bütün deputatların balıq yumurtası hesabına “alınması” “ağlabatan” hesab edilir. Mətbuatda dərc edilən reportajlarda qaldırılan ən mühüm suallar cavabsız qalır: kürü və ya başqa ianələr alıb sonra bunun müqabilində Azərbaycana hansısa xidmətlər göstərənlər kimlərdir? Elə isə bu adamlar nə üçün ittiham edilməyib?
“Der Tagesspiegel” qəzetinin 2015-ci il 30 iyun tarixli nömrəsində deyilir: “Bu gün Almaniya Bundestaqının bir deputatı deyib ki, Avropa Şurasında korrupsiya ictimaiyyətə məlum olduğundan qat-qat artıq rol oynayır”. Əcəb işdir, almaniyalı deputat korrupsiya barədə bilir və məhkəməyə müraciət etmir? Yəqin ki, parlamentin həmin üzvü başqa ölkədən olsaydı, mətbuatda bir səslə qışqırardılar: “Bu, diktatura üçün səciyyəvidir, yəqin ki, o qorxur”.
AZƏRTAC kürü barədə şayiələrin mənbəyini araşdırmaq üçün almaniyalı jurnalistlər və siyasətçilər arasında sorğu keçirib. Nəticə belədir: Bu şayiələrin mənbəyi dəqiq məlum deyil, lakin bəzən Avropa Sabitlik Təşəbbüsünə istinad edirlər. 2014-cü ilin may ayında bu təşkilatın icraçı direktorunun saxta məlumatlar əsasında hazırladığı şərhə Almaniyada çıxan bazar günü qəzetlərindən birində bütöv bir səhifə ayrılıb. Lakin bu halda qeyd edilməyib ki, həmin şəxs özəl müəssisənin icraçı direktorudur və belə təsəvvür yaranıb ki, guya o, həmin qəzetin jurnalistlərindən biridir.
Hər halda, Azərbaycandan söhbət gedəndə bu cür detallarla maraqlanmırlar.
Başqaları daha sadə cavab veriblər: iri həftəlik qəzetlərdən biri AZƏRTAC-ın müxbirinə əlüstü cavab verib ki, (daha doğrusu, onu “başdan etmək üçün” yazıb) oxşar praktika Almaniyanın və başqa ölkələrin KİV-lərində dəfələrlə tətbiq edilib. Görünür, məlumatların həqiqətə nə dərəcədə uyğun olması vacib deyil. Bəs necə olur ki, “kürü diplomatiyası” ilə bağlı ittihamlar KİV-lərdə təkrarlanır, hərçənd kimlərinsə “satın alınması”na dair sübutlar hələ bir yana, hətta bununla bağlı heç bir konkret fakt göstərilməyib. Heç bir ölkədə, o cümlədən Aİ təsisatları hüdudlarında bununla bağlı heç bir cinayət işi, heç bir istintaq başlanmayıb. Görünür, təqsirsizlik prezumpsiyası Azərbaycana ümumiyyətlə şamil edilmir. Hədiyyələr, əgər onlar Azərbaycandan alınırsa, Almaniya KİV-lərinin əksəriyyətində əsas etibarilə adamları satın almaq cəhdləri kimi təqdim edilir. Görəsən almaniyalı deputat Avropa Şurasındakı həmkarlarına Şvartsvald firmasının istehsal etdiyi “quşlu” saat hədiyyə edəndə onları “satın almış” olur?
Fakt budur ki, KİV-lər guya Azərbaycandan hədiyyə kimi balıq kürüsü alan və bunun müqabilində müəyyən xidmətlər göstərən mandat sahiblərindən heç birinin adını AZƏRTAC-a deyə bilməyiblər. Əgər belə hadisə olsaydı, onda “kürü diplomatiyası” neologizmi yerinə düşərdi, əks halda “kürü haqqında yalan” fərziyyəsi məntiqə daha çox uyğundur.
Dağlıq Qarabağ münaqişəsi və ərazisinin 20 faizinin işğal edilməsi, hətta öldürülmüş və girov götürülmüş vətəndaşları barədə Azərbaycan tərəfinin hər hansı məlumatına Almaniya KİV-lərində nə üçün yer verilmir? Əhalisinin sayı 10 milyona yaxınlaşan Azərbaycanın bir milyondan artıq qaçqın və məcburi köçkün vətəndaşı vardır. 1992-ci ildə Xocalıda erməni silahlı bölmələri tərəfindən 623 azərbaycanlıya, o cümlədən qadınlara və uşaqlara qarşı törədilmiş qırğının ildönümü Azərbaycanda matəm günüdür. Amma Almaniya KİV-lərində, ümumiyyətlə, bu qətliamın adı çəkilmir. İkili standartlara dair daha bir misal: Dağlıq Qarabağ münaqişəsi haqqında Almaniya KİV-lərində dərc edilən reportajlarda bir fakta tam etinasızlıq göstərilir ki, Ermənistan bu müharibənin iştirakçısı kimi beynəlxalq hüquq normalarını pozaraq, qonşu dövlətin - Azərbaycanın ərazisinin bir hissəsini hələ də işğal altında saxlamaqda davam edir”.
Açıq məktubun mətni ilə aşağıdakı linkdə tanış ola bilərsiniz:
Bölmənin digər xəbərləri
