“Azİz” İsrail-Azərbaycan Beynəlxalq Assosiasiyasının yeni prezidenti seçilib
Bakı, 11 may, AZƏRTAC
İsrailin Rişon le-Sion şəhərində “Azİz” İsrail-Azərbaycan Beynəlxalq Assosiasiyasının IV qurultayı keçirilib.
Diasporla İş üzrə Dövlət Komitəsindən (DİDK) AZƏRTAC-a bildiriblər ki, tədbirdə “Azİz”in İsrail üzrə nümayəndələri, Dövlət Komitəsinin, ölkənin siyasi, mədəni elitasının təmsilçiləri və media mənsubları iştirak ediblər.
Qurultay iştirakçıları Mark Aqarunov və Salman Rabayevin rəhbərlik etdiyi “Sevgi” ansamblının ifasında ecazkar Azərbaycan musiqisi ilə qarşılanıb.
Qurultay öz işinə İsrail və Azərbaycanın Dövlət himnlərinin səsləndirilməsi ilə başlayıb.
Tədbiri giriş sözü ilə açan Assosiasiyanın Mədəniyyət Mərkəzinin direktoru Yeganə Salman İkinci Dünya müharibəsi zamanı alman faşizmi üzərində qazanılmış Qələbə münasibətilə qurultay iştirakçılarını təbrik edib. Həmin illərdə Azərbaycanın 600 mindən çox oğul və qızının cəbhəyə yollandığını xatırladıb, Azərbaycan nefti olmadan qələbənin qeyri-mümkünlüyünü qeyd edib.
Sonra Diasporla İş üzrə Dövlət Komitəsinin sədri Fuad Muradovun qurultay iştirakçılarına ünvanladığı müraciəti səsləndirilib.
Komitə sədri İsrail-Azərbaycan əlaqələrinin inkişafında, Azərbaycan mədəniyyətinin və həqiqətlərinin İsraildə təbliği istiqamətində Assosiasiyanın həyata keçirdiyi layihələri yüksək dəyərləndirib, “Azİz”in prezidenti Lev Spivaka səmərəli fəaliyyətinə görə təşəkkürünü bildirib, qurultayın işinə uğurlar arzu edib.
Bildirilib ki, qurultay ərəfəsində təşkilatın İdarə Heyətinin üzvlərindən olan Kiryat Balik şəhər bölməsinin rəhbəri Sevin Hanukayev, Assosiasiyanın mətbuat-təbliğat işlərinə rəhbərlik etmiş Yuri Boçarov, eləcə də Assosiasiyanın təftiş komissiyasının rəhbəri Mixail Elioviç “Diaspor fəaliyyətində xidmətə görə” medalı ilə təltif olunublar.
Tədbir Assosiasiyanın qurultaylararası fəaliyyəti ilə bağlı hesabatlarının dinlənilməsi ilə davam edib.
Təşkilatın prezidenti Lev Spivak məruzəsində qeyd edib ki, hesabat dövrünün böyük hissəsi koronavirus pandemiyası dövrünə təsadüf edib. Bu səbəbdən təşkilat müəyyən müddət ərzində fəaliyyətini internet üzərindən davam etdirməli olub. Həmin dövrdə çoxlu sayda onlayn tədbirlərin, görüşlərin, bayram konsertlərinin, yaddaqalan ədəbi-bədii gecələrin təşkil edildiyini xatırladıb. 44 günlük Vətən müharibəsi dövründə isə pandemiya təhlükəsinə baxmayaraq, “Azİz”in təşkilatçılığı ilə Azərbaycan Ordusuna dəstək, erməni separatçılarına qarşı etiraz aksiyalarının keçirildiyini diqqətə çatdırıb.
“Azİz”in baş direktoru Şaul Siman-Tovun rəhbərliyi ilə “Azİz”in nəşriyyat fəaliyyətini xüsusi vurğulayan Lev Spivak xalqımızın Ümummilli Lideri Heydər Əliyevin anadan olmasının 100 illiyinə təşkilat tərəfindən ivrit dilində nəşr olunmuş “Öndə gedən” kitabını təqdim edib.
Daha sonra Heydər Əliyevin həyat və fəaliyyətini əks etdirən qısametrajlı sənədli film nümayiş etdirilib.
Qeyd olunub ki, film bu yaxınlarda finalı keçirilmiş “Gözəl diyar Azərbaycan” uşaq yaradıcılıq festivalının laureatı Konstantin Vararu tərəfindən hazırlanıb.
Qurultayın sonunda “Azİz”in İdarə Heyətinə və rəhbər postlarına namizədlər irəli sürülüb. Səsvermədən sonra qurultay iştirakçıları Assosiasiyanın yeni tərkibi müəyyənləşib.
Səsvermə nəticəsində Adam Amilov “Azİz”in yeni prezidenti, vitse-prezident vəzifələrinə Yeganə Salman, Səadət Şükürova və Viktoriya Dolinskaya seçiliblər.
“Azİz”in İdarə Heyətinin üzvləri - Yerusəlim şöbəsinin rəhbəri Aleksandr Aqranovski, Kiryat-Bialik şöbəsinin rəhbəri Sevin Xanukaev və Nərminə Ağasi öz ürək sözlərini söyləyiblər.
“Azİz”in yeni prezidenti seçilmiş Adam Amilov yüksək etimada görə minnətdarlığını bildirib və təşkilatın əldə etdiyi nailiyyətlərin səviyyəsini daha da yüksək səviyyəyə qaldırmaq üçün var gücü ilə çalışacağını bildirib.
Qurultay bədii hissə ilə yekunlaşıb. Konsert proqramında tanınmış vokalçı Kameliya İoffe və skripkaçı Qəmər Kərimlinin ifasında Azərbaycanın klassik, xalq və estrada musiqisi səsləndirilib.
Qeyd edək ki, Adam Amilov 1966-cı ildə Azərbaycanın Quba rayonunun Qırmızı Qəsəbəsində anadan olub. 1996-cı ildə Kiryat Yam bələdiyyəsində təhsil üzrə koordinator vəzifəsini tutub. 2007-2011-ci illərdə “Azİz” İsrail-Azərbaycan Beynəlxalq Assosiasiyasının vitse-prezidenti, 2010-2011-ci illərdə Volfson Fondu və Absorbsiya Nazirliyindən Qafqazdan olan yəhudi mühacirlərinin İsraildə icmasının təşviqi və inteqrasiyasına yönəlmiş "Tnufa" ümumisrail birgə layihəsinin rəhbəri, 2012-ci ildə Qafqaz Yəhudilərinin Ümumİsrail Assosiasiyasının baş direktoru, eləcə də Yəhudi Milli Fondunun Şimal bölgəsi üzrə koordinatoru vəzifələrində çalışıb. 2013-cü ildən İsrailin Kiryat Yam şəhərinin vitse-meri vəzifəsində çalışır.
Bölmənin digər xəbərləri
