AZSTAND-ın nümayəndələri Moldovada keçirilən seminarda iştirak ediblər
Bakı, 3 aprel, AZƏRTAC
Azərbaycan Standartlaşdırma İnstitutunun (AZSTAND) nümayəndələri “Şərq Tərəfdaşlığı Ölkələrində Ticarətin Artırılması üçün Keyfiyyət Standartları” layihəsi çərçivəsində Almaniyanın Milli Metrologiya İnstitutunun (PTB) maliyyələşdirilməsi ilə keçirilən seminarda iştirak ediblər.
AZSTAND-dan AZƏRTAC-a bildirilib ki, Moldovanın Kişineu şəhərində “Gələcək regional əməkdaşlıq potensialının araşdırılması” mövzusunda keçirilən seminarda 5 ölkənin təmsilçiləri sırasında Azərbaycandan Standartlaşdırma İnstitutunun, eləcə də Azərbaycan Metrologiya İnstitutu (AZMİ) və Azərbaycan Akkreditasiya Mərkəzinin (AZAK) nümayəndələri də iştirak ediblər.
Seminar çərçivəsində tərəflər arasında qarşılıqlı əməkdaşlıq perspektivləri, təcrübə mübadiləsi imkanları və keyfiyyət infrastrukturunun gücləndirilməsi istiqamətində müzakirələr aparılıb.
Bundan əlavə, “Şərq Tərəfdaşlığı Ölkələrində Keyfiyyət İnfrastrukturu Forumu”nun təşkili, standartlaşdırma üzrə müştərək güzgü texniki komitələrinin formalaşdırılması, rəqəmsallaşdırma və ikitərəfli əməkdaşlıqlar barədə fikir mübadiləsi aparılıb.
Bölmənin digər xəbərləri
