“B2 First” Kembric kvalifikasiyası imtahanı üçün qeydiyyat elan edilir
Bakı, 1 iyul, AZƏRTAC
Avqustun 30-da Dövlət İmtahan Mərkəzinin (DİM) Binəqədi rayonu, Süleyman Sani Axundov küçəsi, 50 ünvanında yerləşən binasında “B2 First” Kembric kvalifikasiyası imtahanı keçiriləcək.
DİM-dən AZƏRTAC-a bildirilib ki, imtahanda iştirak etmək üçün son qeydiyyat avqustun 26-dək aparılacaq.
“B2 First” imtahanı namizədlərin daha yüksək səviyyədə hazırlaşması üçün bir vasitədir və onların ingilisdilli bir mühitdə özünəinamlı şəkildə ünsiyyət qurmaqları üçün lazım olan dil bacarıqlarını qiymətləndirir. Bu imtahan 4 bölmədən ibarətdir:
- Oxu və ingilis dilinin istifadəsi (Reading and Use of English) - 1 saat 15 dəqiqə;
- Yazı (Writing) – 1 saat 20 dəqiqə;
- Dinləmə (Listening) - 40 dəqiqə;
- Danışıq (Speaking) – 16 dəqiqə.
Bu imtahanın oxu və ingilis dilinin istifadəsi, yazı və dinləmə bölmələri kompüter vasitəsilə, danışıq bloku isə əyani formada keçirilir. Digər beynəlxalq imtahanlardan fərqli olaraq Kembric kvalifikasiya imtahanlarının danışıq bölməsi namizədlərin cüt (və ya 3 nəfərdən ibarət qrup) şəkildə iştirakı ilə danışıq mütəxəssisləri tərəfindən aparılır.
İmtahan iştirakçıları nəticələrini elektron qaydada 2 həftə sonra əldə edə bilərlər.
Qeydiyyat və Kembric kvalifikasiyaları barədə daha ətraflı məlumatla DİM-in müvafiq səhifəsindən tanış olmaq mümkündür.
Bölmənin digər xəbərləri
