Naxçıvan, 22 sentyabr, AZƏRTAC

Azərbaycan Respublikasının Prezidenti cənab İlham Əliyev deyib: “Azərbaycan xalqı daha da yaxşı yaşamalıdır. Hər bir bölgədə quruculuq, inkişaf daha da sürətlə getməlidir”.

Naxçıvan Muxtar Respublikasında quruculuq işlərinin həcmi ilbəil artır. Şəhər və kəndlərdə yeni sosial obyektlər inşa olunur, xidmət sahələri yaradılır. Kənd yollarının yenidən qurulması, yeni məktəb binalarının, kənd və xidmət mərkəzlərinin istifadəyə verilməsi əhalinin rahat yaşayışına səbəb olub.

Naxçıvan Muxtar Respublikası Ali Məclisinin mətbuat xidmətindən AZƏRTAC-a bildirilib ki, sentyabrın 22-də Babək rayonunun Xal-xal kəndində yeni sosial obyektlər istifadəyə verilib.

Xal-xal kənd yolu müasir tələblərə cavab verir

Hər bir yaşayış məntəqəsinin abadlığını təsdiq edən əsas amillərdən biri də onun yollarının müasir və rahat olmasıdır. Bu gün muxtar respublikada şəhər, qəsəbə və kənd yollarının təmiri və yenidən qurulması diqqət mərkəzində saxlanılır. Bu işlər Babək rayonunda da uğurla həyata keçirilir.

Sentyabrın 22-də Xal-xal kənd avtomobil yolunun açılışı olub.

Naxçıvan Muxtar Respublikası Ali Məclisinin Sədri Vasif Talıbov açılışı bildirən lenti kəsib, sakinləri təbrik edib, yolda aparılan yenidənqurma işləri ilə tanış olubdur.

Məlumat verilib ki, tikinti işləri zamanı kənddaxili 3 kilometr yola asfalt örtük salınıb. Avtomobillərin, eləcə də piyadaların rahat hərəkəti üçün müvafiq yol-hərəkət nişanları quraşdırılıb, hərəkətin təhlükəsizliyi təmin olunub. Yolda 50 su keçidi tikilib, 1100 metr beton kanal çəkilib.

Xal-xal kənd tam orta məktəbi üçün yeni bina inşa olunub

Sentyabrın 22-də Xal-xal kənd tam orta məktəbinin yeni binası istifadəyə verilib.

Naxçıvan Muxtar Respublikası Ali Məclisinin Sədri Vasif Talıbov açılış tədbirində iştirak edib.

Tədbirdə məktəbin direktoru İlqar Quliyev çıxış edərək deyib ki, muxtar respublikanın bütün yaşayış məntəqələrində yeni məktəb binaları tikilir, maddi-texniki baza möhkəmləndirilir. Bu gün Xal-xal kənd tam orta məktəbi də müasir təhsil müəssisələrinin sırasına qoşuldu. Məktəbdə yaradılan şərait gənclərin yaxşı təhsil almasına, onların hərtərəfli inkişafına imkan verəcəkdir. Müasir tədris şəraiti müəllimlərin üzərinə düşən məsuliyyəti daha da artırır. Kollektiv adından minnətdarlıq edən İlqar Quliyev yaradılan şəraitdən istifadə edərək təhsilin səviyyəsini yüksəldəcəklərinə söz verib.

Naxçıvan Muxtar Respublikası Ali Məclisinin Sədri Vasif Talıbov müəllim və şagirdləri yeni məktəb binasının istifadəyə verilməsi münasibətilə təbrik edib, ümummilli liderimiz Heydər Əliyevin “Təhsil hər bir dövlətin, ölkənin, cəmiyyətin həyatının, fəaliyyətinin mühüm sahəsidir”, - fikrini xatırladaraq deyib: Ölkə Prezidenti cənab İlham Əliyev Ulu Öndərin tövsiyələrinə uyğun olaraq təhsilin inkişafına xüsusi diqqət və qayğı göstərir. Hər il onlarla yeni məktəb binaları, universitet şəhərcikləri tikilərək ölkəmizin gələcəyi olan gənclərin istifadəsinə verilir.

Ali Məclisin Sədri deyib: Muxtar respublikada məktəblər müasir tədrisin tələblərinə uyğun qurulur. Bu da kollektiv qarşısında mühüm vəzifələr qoyur. Müəllimlər çalışmalıdırlar ki, məktəblərdə təhsilli, vətənpərvər gənclər yetişdirilsin. Məktəbi bitirən hər bir gənc istər peşə məktəblərində, istərsə də orta ixtisas və ali təhsil müəssisələrində təhsillərini davam etdirməli, mütləq bir peşə sahibi olmalı, vətənpərvər böyüməlidirlər. Gələcəkdə harada yaşamasından və fəaliyyət göstərməsindən asılı olmayaraq hər bir gənc, ilk növbədə, dövlətinə və xalqına xidmət etməli, ölkəmizin gələcəyi üçün məsuliyyət daşımalıdır. Bütün bunları isə gənclərə müəllimlər aşılamalı, onlar yalnız təhsilli deyil, həm də vətənpərvər gənclər yetişdirməlidirlər.

Qeyd olunub ki, Xal-xal kənd tam orta məktəbi uzun müddət uyğunlaşdırılmış və şəraiti olmayan binada fəaliyyət göstərib. Lakin buna baxmayaraq məktəbin nailiyyətləri olub. Ötən tədris ilinin nəticələrinə əsasən məktəbin fəaliyyətini qənaətbəxş hesab etmək olar.

Qazanılan nailiyyətlərə görə məktəbin kollektivinə təşəkkür edən Ali Məclisin Sədri kollektivin bundan sonra da yaradılan şəraitdən düzgün istifadə edəcəyinə əminliyini bildirib, onlara tədrisdə uğurlar arzulayıb.

Açılışı bildirən lent kəsildikdən sonra məktəb binasına baxış olub.

Məlumat verilib ki, üçmərtəbəli məktəb binası 192 yerlikdir. Məktəbdə 3-ü elektron lövhəli olmaqla 12 sinif otağı, kimya-biologiya və fizika laboratoriyaları, hərbi kabinə, şahmat sinfi, kompüter və müəllimlər otaqları, kitabxana, bufet, idman zalı istifadəyə verilib, həyətdə açıq idman qurğuları quraşdırılıb.

Təhsil ocağında şagirdlərin asudə vaxtının səmərəli təşkilinə və biliklərinin möhkəmləndirilməsinə xüsusi diqqət yetirilir. Məktəbin kitabxana fondunda 1300 latın qrafikalı dərslik və 1550 bədii ədəbiyyat olmaqla 2850 kitab vardır. Şagirdlər dərs saatlarında əldə etdikləri bilikləri burada daha da möhkəmləndirəcək, dünyagörüşlərini artıracaqlar.

Ali Məclisin Sədri tədris prosesində kitabxana işinin düzgün təşkil olunmasının əhəmiyyətini qeyd edib, şagirdlərin kitabxanaya cəlb edilməsini tapşırıb.

İnformasiya texnologiyalarının tətbiqi təhsildə ən səmərəli vasitədir. Bu gün muxtar respublikada informasiya-kommunikasiya texnologiyalarına əsaslanan müasir tədris sistemi qurulur. Həyata keçirilən tədbirlərin davamı olaraq Xal-xal kənd tam orta məktəbinin kompyuter sinfində 17 kompyuter dəsti quraşdırılıb və internetə qoşulub. Burada informatika fənni nəzəri və praktik əsaslarla öyrədiləcəkdir. Həmçinin şagirdlər müxtəlif fənlərə aid internet resurslarından istifadə edə biləcəklər. İstifadəyə verilən elektron lövhəli siniflər isə elektron dərsliklərdən istifadə ilə yanaşı, distant dərslərin keçirilməsinə də imkan verəcəkdir.

Ali Məclisin Sədri elektron lövhəli sinifdə Heydər Əliyev muzeyi ilə muxtar respublikanın 212 təhsil müəssisəsi arasında keçirilən distant dərsi izləyib.

Məktəbin laboratoriyaları kimya, biologiya və fizika fənləri üzrə keçirilən dərslərin mövzusuna uyğun müasir təcrübə avadanlıqları ilə təchiz olunub.

Ali Məclisin Sədri birinci sinif şagirdlərinin dərs prosesi ilə maraqlanıb. Bildirilib ki, 2015-2016-cı tədris ilində Xal-xal kənd tam orta məktəbində birinci sinfə 13 şagird qəbul olunub. Uşaqların əvvəlcədən məktəbə hazırlıq məşğələlərinə cəlb olunması onların dərslərdə daha fəal iştirakını təmin edib.

Gənc nəslin intellektual inkişafı ilə yanaşı, sağlam və vətənpərvər ruhda böyüdülməsi də məktəb kollektivinin üzərinə düşən əsas vəzifələrdəndir. Binada geniş idman zalının, hər cür əyani vəsaitlərlə təmin olunan hərbi kabinənin istifadəyə verilməsi kollektivin bu sahədə işini xeyli asanlaşdırıb.

Ali Məclisin Sədri müəllimlərlə söhbət zamanı deyib ki, ölkənin gələcəyi onun gənclərinin hansı səviyyədə yetişməsindən asılıdır. Təhsilli, vətənpərvər gəncləri olan ölkənin gələcəyi də parlaqdır. Ailələrdə uşaqlar məktəbə, məktəblərdə isə ölkənin gələcəyinə hazırlanırlar. Xal-xal kənd tam orta məktəbində də yaxşı təhsil ənənəsi vardır. Kollektiv yaradılan şəraitdən istifadə edərək gələcəkdə nailiyyətləri daha da artırmalı, məktəbdə təhsilli, vətənpərvər gənclər yetişdirilməlidir.

Müəllimlər adından minnətdarlıq edən Məhluqə Kərimova deyib ki, kollektiv uzun illərdir köhnə, yararsız məktəb binasında dərs keçirdi. Bu gün müasir tələblərə uyğun məktəb binasının istifadəyə verilməsi hər bir müəllimi ürəkdən sevindirir, bunu təhsilə göstərilən qayğının daha bir ifadəsi kimi dəyərləndirirlər. Bu gün ölkəmizdə müəllimlərin əməkhaqqı artırılır, onların sosial şəraiti ilbəil yaxşılaşdırılır. Naxçıvan Muxtar Respublikası Ali Məclisi Sədrinin “Naxçıvan Muxtar Respublikasının dövlət ümumi təhsil müəssisələrində çalışan bilik və bacarıqlarının qiymətləndirilməsi aparılan müəllimlərin dərs yükünün və əməkhaqqının artırılması haqqında” Sərəncamı da bunun bariz nümunəsidir.

Məktəbin həyəti də abadlaşdırılıb, yaşıllıqlar salınıb.

Kənd mərkəzində müasir şərait yaradılıb

Xal-xal kəndində yeni Kənd mərkəzinin istifadəyə verilməsi və dövlət qurumlarının bir binada yerləşdirilməsi sakinlərin rahatlığını təmin edib.

Sentyabrın 22-də Xal-xal Kənd mərkəzinin açılışı olub.

Naxçıvan Muxtar Respublikası Ali Məclisinin Sədri Vasif Talıbov açılış tədbirində iştirak edib.

Tədbirdə kənd inzibati ərazi dairəsi üzrə nümayəndə Vasif İsmayılov deyib ki, Xal-xal kəndi abad yaşayış məntəqəsinə çevrilib. Bu gün kənddə insanların rahat yaşayışına xidmət edən ən müasir infrastruktur yaradılıb. Kənd tamamilə qazlaşdırılıb, bütün mənzillər fasiləsiz elektrik enerjisi ilə təmin olunub, təsərrüfatların inkişafı və genişləndirilməsi üçün hərtərəfli şərait yaradılıb. Bütün bunlar insanların torpağa bağlılığını daha da artırır.

Naxçıvan Muxtar Respublikası Ali Məclisinin Sədri Vasif Talıbov çıxış edərək deyib: Bu gün Xal-xal kəndinin həyatında əlamətdar gündür. Kənddə yeni sosial obyektlər tikilərək sakinlərin istifadəsinə verilir. Hər bir kəndin abadlaşması orada insanların rahat yaşamasına xidmət edir. Xal-xal kəndində çəkilən yeni yol, tikilən məktəb binası, kənd və xidmət mərkəzləri, kənd mərkəzində yerləşən feldşer-mama məntəqəsi, poçt bölməsi, baytarlıq məntəqəsi və digər xidmət sahələri əhaliyə daha yaxşı xidmət göstərilməsinə, eləcə də onların rahat yaşayışına imkan verəcəkdir.

Ali Məclisin Sədri deyib: Bu gün Xal-xal kəndində görülən kompleks quruculuq işləri müasir Azərbaycan kəndinin nümunəsidir. Yaradılan şəraitdən düzgün istifadə isə kənd sakinlərinin və burada fəaliyyət göstərən dövlət qurumlarının üzərinə düşən əsas vəzifələrdir. Ona görə də sakinlər qurulanları qorumalı, yaşıllıqlar artırmalı, təmizliyə diqqət yetirməli, yaradılan şəraitdən istifadə edərək təsərrüfatlarını genişləndirməlidirlər. Dövlət orqanlarında çalışanlar kəndin abadlaşmasında və inkişafında yaxından iştirak etməli, bu qurumların nizamlı və qanunauyğun fəaliyyətinə diqqət artırılmalıdır. Rayon icra hakimiyyəti də kəndlərdə inkişafın təmin olunması üçün lazımi tədbirlər görməli, məskunlaşma artmalıdır.

Ali Məclisin Sədri kənd sakinlərinin yaradılan şəraitdən səmərəli istifadə edəcəklərinə əminliyini bildirib, onları kənddə aparılan kompleks quruculuq işləri münasibətilə təbrik edib.

Sonra Ali Məclisin Sədri Kənd mərkəzinin açılışını edib.

Məlumat verilib ki, ikimərtəbəli Kənd mərkəzində inzibati ərazi dairəsi üzrə nümayəndəlik və baytarlıq məntəqəsi üçün otaqlar, Yeni Azərbaycan Partiyası ərazi ilk təşkilatı, rabitə evi, polis sahə və feldşer-mama məntəqələri, kitabxana və iclas zalı yerləşir. Binada dövlət orqanları üçün müasir iş şəraiti yaradılıb, otaqların hər biri zəruri mebel dəstləri ilə təchiz edilib. Kənd mərkəzinin kitabxanasında 10 mindən artıq kitab vardır.

Kənd mərkəzindəki baytarlıq məntəqəsində nümunəvi şərait yaradılıb, lazımi dərman vasitələri və soyuducu qoyulub.

Baxış zamanı tapşırılıb ki, baytarlıq məntəqəsinin əməkdaşları kənddə heyvandarlığın inkişafını, əhalinin keyfiyyətli ət və süd məhsulları ilə təminatını diqqət mərkəzində saxlamalı, yerlərdə maarifləndirici tədbirlər və yoxlamalar aparmalı, mal-qara arasında baş verə biləcək yoluxucu xəstəliklərin qarşısı vaxtında alınmalıdır.

Rabitə evindəki poçt bölməsində lazımi şərait yaradılıb. Burada gündəlik mətbuatın, danışıq və internet kartlarının satışı və digər poçt xidmətləri həyata keçirilir.

Kənd mərkəzində feldşer-mama məntəqəsi üçün 3 otaq ayrılıb. Məntəqə müayinə və ilkin tibbi yardım üçün lazım olan bütün avadanlıqlarla təchiz olunub, lazımi dərman preparatları qoyulub.

Ali Məclisin Sədri insanların sağlamlığının diqqət mərkəzində saxlanılmasının vacibliyini bildirib, hamilə qadınların və uşaqların qeydiyyata alınması, onlara vaxtlı-vaxtında tibbi xidmət göstərilməsi barədə tapşırıqlar verib.

Kənddə yeni Xidmət mərkəzi tikilib

Həmin gün Xal-xal kəndində yeni Xidmət mərkəzinin də açılışı olub.

Naxçıvan Muxtar Respublikası Ali Məclisinin Sədri Vasif Talıbov açılışı bildirən lenti kəsdikdən sonra Xidmət mərkəzinə baxıb.

Məlumat verilib ki, Xidmət mərkəzində bərbərxana, qadın gözəllik salonu, ət satışı yeri və ərzaq-sənaye malları mağazası fəaliyyət göstərir. Xidmət mərkəzinin fəaliyyətə başlaması sakinlərə göstərilən xidmətlərin səviyyəsini yüksəldib. Burada kənddə yetişdirilən məhsullarla yanaşı, keyfiyyətli ərzaq və sənaye malları da satışa çıxarılır. Mərkəzdə 4 nəfər işlə təmin olunub.

Xidmət mərkəzi ilə tanışlıqdan sonra sakinlərlə görüş olub.

Ali Məclisin Sədri deyib ki, Xal-xal kəndi müasir yaşayış məntəqəsinə çevrilib. Zəhmətkeş insanları və bərəkətli torpaqları olan bu kənddə aparılan kompleks quruculuq tədbirləri insanların rahat yaşayışına imkan verəcəkdir. Sakinlər yaradılan şəraitdən istifadə etməli, kəndin abadlığı, təmizliyi qorunub saxlanılmalıdır. Ali Məclisin Sədri qarşıdan gələn Qurban bayramı münasibətilə sakinləri təbrik edib, onlara firavan həyat arzulayıb.

Kənd ağsaqqalı Hamlet Bağırov sakinlər adından minnətdarlıq edərək deyib: Xal-xal kəndində aparılan quruculuq işləri bütün sahələri əhatə edib, yollar abadlaşdırılıb, kənd və xidmət mərkəzləri, məktəb binası kəndə qəsəbə görkəmi verib. Bu gün kənddə əhalinin məşğulluğunun təmin olunması, təsərrüfatların inkişafı, insanların rahat və firavan yaşaması üçün hər cür şərait vardır. Bütün bunlar ümummilli liderimiz Heydər Əliyevin müəyyənləşdirdiyi siyasi xəttin bəhrələridir. Bu gün ölkəmiz davamlı inkişaf mərhələsindədir. Sabitlik və firavanlıq şəraitində yaşayırıq. Sakinlər göstərilən qayğının müqabilində daha səylə çalışacaq, Ulu Öndərimizin siyasi xəttinə daim sədaqət göstərəcək, ölkəmizin inkişafında, aparılan abadlıq-quruculuq işlərində yaxından iştirak edəcəklər.

* * *

Kənddə aparılan abadlıq-quruculuq tədbirləri çərçivəsində 1100 metr yeraltı rabitə, 800 metr fiber-optik, 3 kilometrdən artıq elektrik xətti çəkilib. Həmçinin yeni tikililərə 680 metr uzunluğunda qaz xətti çəkilib, 200 metr məsafədə damcılı suvarma şəbəkəsi qurulub.