Bağdadda “Azərbaycan-İraq münasibətləri. Gələcək əməkdaşlıq üçün imkanlar” mövzusunda konfrans keçirilib
Bağdad, 16 noyabr, AZƏRTAC
Azərbaycanın İraqdakı səfirliyinin təşkilatçılığı ilə “Rewaq Baghdad” Tədqiqat Mərkəzində “Azərbaycan-İraq münasibətləri. Gələcək əməkdaşlıq üçün imkanlar” mövzusunda konfrans keçirilib.
AZƏRTAC xəbər verir ki, tədbirdə mərkəzin rəhbəri, İraq parlamentinin Beynəlxalq əlaqələr komitəsinin əməkdaşı Abbas Al-Anburi, İraq Ticarət Nazirliyinin beynəlxalq əlaqələr idarəsinin rəisi Adel Al-Masoodi, Bağdad Universitetinin Beynəlxalq əlaqələr kafedrasının professorları İbrahim Al-Abadi və Əhməd Əbdül Al-Ambari, jurnalist-tədqiqatçı Hüseyn Fouzi, professor Moataz Muhi Əbdülhəmid, Türkiyənin və Pakistanın İraqdakı səfirliklərinin nümayəndələri, siyasi ekspertlər və yerli mətbuatın nümayəndələri iştirak ediblər.
Mərkəzin rəhbəri A.Al-Anburi Azərbaycan-İraq münasibətlərindən söz açaraq, iki ölkə arasında son zamanlaradək əlaqələrin qənaətbəxş olmadığını, lakin Azərbaycanın İraqdakı səfirliyinin aktiv fəaliyyəti nəticəsində bu münasibətlərin yüksələn xətlə inkişafa yönəldiyini bildirib. Müxtəlif dövlət qurumlarının nümayəndələrinin qarşılıqlı səfərləri təşkil olunub və bir sıra razılaşmalar əldə edilib. Diqqətə çatdırıb ki, İraqın xarici siyasətində Azərbaycan prioritet mövqedə dayanır.
Səfirliyin müvəqqəti işlər vəkili Nəsir Məmmədov Azərbaycan-İraq əlaqələrinə toxunaraq, bu münasibətlərin tarixi və müasir dövrdəki vəziyyəti barədə ətraflı məlumat verib. N.Məmmədov cari il ərzində İraq parlamentinin, rabitə və neft nazirlərinin, İraqın Ticarət Palatasının prezidentinin Azərbaycana səfərlərini xatırladıb və səfər zamanı əldə edilən razılaşmaların faydalı olacağına əminliyini bildirib.
Diplomat Qarabağ münaqişəsinin tarixinə toxunaraq Ermənistanın işğalçı siyasəti nəticəsində ərazilərimizin 20 faizinin 30 ilə yaxın işğal altında qalaraq talan edilməsindən danışıb. Dağıdılan məscidlər, muzeylər və tarixi abidələrin şəkilləri nümayiş etdirilib. Vurğulanıb ki, Azərbaycan Ordusu Müzəffər Ali Baş Komandan İlham Əliyevin rəhbərliyi ilə ötən il 44 günlük Vətən müharibəsi nəticəsində ərazilərimiz işğaldan azad olunub.
N.Məmmədov postmüharibə dövründəki reallıqlar və azad olunmuş ərazilərdə aparılan bərpa-quruculuq işləri barədə tədbir iştirakçılarına ətraflı məlumat verib.
Sonra diplomat iştirakçıların suallarını cavablandırıb.
Konfransda iştirak edən professor Moataz Muhi Əbdülhəmid müəllifi olduğu “Qarabağ: münaqişənin tarixi” adlı kitabı təqdim edib. Bildirib ki, Azərbaycan torpaqlarının işğaldan azad olunması, tarixi ədalətin bərpası ilə nəticələnmiş Vətən müharibəsi və postmünaqişə dövrünə həsr edilmiş yeni kitabın üzərində iş yekunlaşmaqdadır.
Digər natiqlər də regionda gedən siyasi prosesləri təhlil edərək fikir mübadiləsi apardılar.
Konfransın sonunda N.Məmmədov İraq televiziyasının müxbirinin suallarını cavablandırıb.
Rabil Kətanov
AZƏRTAC-ın xüsusi müxbiri
Bağdad
Bölmənin digər xəbərləri
