Bakı Ali Neft Məktəbinin komandası “Enactus Azərbaycan yaz məktəbi” layihəsinin müsabiqəsində qalib oldu
Bakı, 23 aprel, AZƏRTAC
Azərbaycan Respublikası Gənclər Fondunun maliyyə dəstəyi, Tələbə Gənclər Təşkilatları İttifaqı və Gənclərin Maarifləndirilməsinə Dəstək İctimai Birliyinin birgə təşkilatçılığı ilə “Enactus Azərbaycan yaz məktəbi” layihəsi reallaşıb. İki gün ərzində peşəkar təlimçilər tərəfindən biznes, marketinq, sahibkarlıq, motivasiya və data analitikası mövzularında təlimlər keçirilib.
Respublikanın 18 universitetinin iştirak etdiyi “Enactus Azərbaycan yaz məktəbi”nin “Sual-cavab” müsabiqəsində Bakı Ali Neft Məktəbinin (BANM) komandası verilən bütün sualları doğru cavablayaraq I yerin sahibi olub.
Bu barədə AZƏRTAC-a BANM-dən məlumat verilib. Bildirilib ki, yarışda BANM-i “Enactus BANM” komandasının kapitanı IV kurs tələbəsi Günel Hüseynli, komanda üzvləri - III kurs tələbələri Mirkazım Ağayev, Taliyə Məmmədhəsənzadə və Şükran Əlizadə, IV kurs tələbəsi Fidan Aslanova və BANM-də MBA üzrə təhsil alan Pakizə Talıblı təmsil edib.
Qeyd edək ki, yarışda II yerə Azərbaycan Dövlət İqtisad Universiteti, III yerə isə Azərbaycan Tibb Universiteti, Azərbaycan Dövlət Aqrar Universiteti və Azərbaycan Memarlıq və İnşaat Universiteti layiq görülüb.
Bölmənin digər xəbərləri
