BAKI FUTBOL FEDERASİYASI UEFA-NIN DİPLOMLARINA LAYİQ GÖRÜLMÜŞDÜR
AZƏRTAC xəbər verir ki, Bakı Futbol Federasiyası (BFF) UEFA-nın Avropanın regional futbol qurumları arasında keçirdiyi “Grassroots” proqramı üzrə illik müsabiqədə iki nominasiya üzrə qalib hesab edilmişdir. BFF veteranlarla işin təşkilinə və uşaq futbolunun inkişafında səmərəli fəaliyyətinə görə, 2006-cı ilin laureatı hesab edilmiş, UEFA-nın fəxri diplomlarına layiq görülmüşdür.
Xatırladaq ki, BFF ötən il Tofiq Bəhramov adına Respublika stadionunda Rusiya və SSRİ-nin Avropa və Olimpiya çempionlarından ibarət komandaları ilə Bakının veteranlardan ibarət yığması arasında görüşlər keçirmiş, “Şöhrət” ordeninə layiq görülmüş futbolçular Ələkbər Məmmədov və İsgəndər Cavadovun yubiley mərasimlərini təşkil etmişdir.
BFF-nin keçirdiyi “Sabahın ulduzları” və “Ümid” paytaxt çempionatları futbol ictimaiyyəti arasında böyük əks-səda doğurmuş, kiçik istedadların üzə çıxarılmasında əhəmiyyətli rol oynamışdır.
Bölmənin digər xəbərləri
