Bakıda “Din və qlobal təhlükəsizlik” kitabının təqdimatı olub
Bakı, 6 aprel, AZƏRTAC
Aprelin 6-da Dini Qurumlarla İş üzrə Dövlət Komitəsinin (DQİDK) sədr müavini Səyavuş Heydərovun “Din və qlobal təhlükəsizlik” kitabının təqdimat mərasimi keçirilib.
AZƏRTAC xəbər verir ki, Azərbaycan İlahiyyat İnstitutunda (Aİİ) keçirilən tədbirdə əvvəlcə ölkəmizin ərazi bütövlüyü uğrunda mübarizədə canlarını qurban vermiş şəhidlərimizin əziz xatirəsi bir dəqiqəlik sükutla yad edilib.
Aİİ-nin rektoru, dosent Aqil Şirinov çıxış edərək bildirib ki, qlobal müstəvidən baxdıqda, xüsusilə XX əsrdən etibarən dünyanın müxtəlif bölgələrində din təkcə mənəviyyat mövzusu deyil, həm də təhlükəsizlik mövzusu olaraq önə çıxmağa başlayıb. İslam başda olmaqla, heç bir din insanları zorakılığa, terrora sövq etmir, əksinə, sülhə dəvət edir.
Dini Qurumlarla İş üzrə Dövlət Komitəsinin sədri Mübariz Qurbanlı çıxışında kitabın nəşrini zəruri edən amillərdən söz açıb. Bildirib ki, əsərdə qaldırılan məsələlər bugünkü dünyamızda baş verən hadisələr fonunda çox böyük əhəmiyyət daşıyır.
Eyni zamanda, vurğulanıb ki, hər il Prezident İlham Əliyev tərəfindən dini icmaların fəaliyyətinə dəstək göstərilməsi üçün maddi yardım ayrılır. Dövlətimizin başçısı Prezident İlham Əliyev və Birinci vitse-prezident, Heydər Əliyev Fondunun prezidenti Mehriban xanım Əliyeva xüsusi qayğı və həssaslıqla hər zaman dini sahəni diqqətdə saxlayırlar.
Dövlət Komitəsi sədrinin müavini Səyavuş Heydərov qeyd edib ki, mövcud mənəvi böhranın aradan qaldırılması və bəşəriyyətin təhlükəsizliyinin təminatı məqsədilə qlobal mahiyyətli konsepsiyalara yenidən baxılması, onların icrasına məsul təsisatların ədalət prinsipinə sadiq qalmaqla gücləndirilməsinin vacibliyi bütün aşkarlığı ilə üzə çıxır. Bunlar dünya ictimaiyyətindən kollektiv məsuliyyətin artırılmasını tələb edir.
Milli Məclisin deputatı, professor Anar İsgəndərov əsərin aktual məsələləri ehtiva etdiyini, təhlükəsizliyin cəmiyyətimizin hər bir fərdi üçün vacib məsələ olduğunu diqqətə çatdırıb, ölkəmizdə dinlərarası, eyni zamanda, məzhəblərarası münasibətlərin, milli-mənəvi dəyərlərimizin qorunub-saxlanılmasının önəmini vurğulayıb.
Parlamentin deputatı Ceyhun Məmmədov qlobal təhlükəsizliyin vacibliyi məsələsinə toxunub. Diqqətə çatdırılıb ki, hazırda din pərdəsi altında Azərbaycana qarşı edilən təhdidlərə qarşı birgə mübarizə vacibdir.
Kitab haqqında fikirlərini bölüşən Bakı Beynəlxalq Multikulturalizm Mərkəzinin nümayəndəsi Araz Qurbanov qeyd edib ki, müəllif əsərə milli təhlükəsizlik müstəvisində yanaşıb və problemlərin aradan qaldırılması üçün tövsiyələrini verib.
Azərbaycanda Katolik Kilsəsinin Apostol Prefekturasının yepiskopu Vladimir Fekete, Rus Pravoslav Kilsəsinin Bakı və Azərbaycan Yeparxiyasının nümayəndəsi Elnur Əfəndiyev, Alban-Udi Xristian dini icmasının sədri Robert Mobili və Azərbaycan Bəhailəri Dini Mərkəzinin katibi Ramazan Əsgərli çıxışlarında vurğulayıblar ki, kitabda çoxkonfessiyalı ölkəmizin timsalında dinin dövlətin milli təhlükəsizliyinin möhkəmlənməsinə verə biləcəyi töhfələr parlaq şəkildə ifadə edilib. Azərbaycan kimi çoxmillətli və çoxkonfessiyalı dövlət üçün dini təhlükəsizlik məsələlərinin önəmi, xarici təhdidlər qarşısında xalqın həmrəyliyinin vacibliyi, dinindən, milliyyətindən asılı olmayaraq, hər bir vətəndaşın diqqətli və məsuliyyətli davranmalı olduğu diqqətə çatdırılıb.
Bölmənin digər xəbərləri
