Bakıda keçirilmiş beynəlxalq paracüdo Qran-Prisinin təşkilatçılıq səviyyəsi yüksək qiymətləndirilib
Bakı, 31 may, AZƏRTAC
İtaliyanın Görmə Məhdudiyyətli Şəxslərin Paralimpiya İdman Federasiyasının prezidenti Sandro Di Cirolamo Azərbaycan Milli Paralimpiya Komitəsinin prezidenti İlqar Rəhimova təşəkkür məktubu göndərib.
AZƏRTAC xəbər verir ki, məktubda mayın 13-14-də Bakıda keçirilmiş paracüdo üzrə beynəlxalq Qran-Pri yarışının mühüm idman hadisələrindən olduğu vurğulanıb. Bakıda yüksək qonaqpərvərliyə və səmimi qarşılanmaya görə federasiyanın adından dərin təşəkkür ifadə olunaraq, idmançıların ölkəmizdən xoş təəssüratlarla ayrıldığı qeyd edilib.
Xatırladaq ki, Heydər Əliyev adına İdman Sarayında keçirilən Qran-Pri yarışında 35 ölkədən 214 cüdoçu 13 dəst medal uğrunda mübarizə aparıb. Qran-Pri “Tokio 2020” XVI Yay Paralimpiya Oyunlarına lisenziya xalları qazandırıb. Azərbaycan millisi 3 qızıl, 4 gümüş və 4 bürünc medalla komanda hesabında ikinci yeri tutub.
Bölmənin digər xəbərləri
