Bakıda Maliyyə və Texnologiyalar Sammiti keçirilir VİDEO
Bakı, 16 may, AZƏRTAC
Mayın 16-da Bakıda "Maliyyə və rəqəmsal texnologiyalar həftəsi" çərçivəsində ikigünlük "Fintex Sammit - Maliyyə və Texnologiyalar Sammiti" işə başlayıb.
Sammitin media tərəfdaşı AZƏRTAC xəbər verir ki, açılış mərasimində çıxış edən Nəqliyyat, Rabitə və Yüksək Texnologiyalar naziri Ramin Quluzadə ölkədə informasiya texnologiyaları sahəsində görülən işlərdən, əldə olunan nailiyyətlərdən danışıb. Bildirib ki, son dövrlər informasiya texnologiyaları sektorunda yeni inkişaf trendləri meydana gəlib. Dünyada blokçeyn qlobal fenomenə çevrilib. Nazirlik Azərbaycanda blokçeyn texnologiyalarının tətbiqi ilə bağlı bütün təşəbbüsləri dəstəkləyir: “Blokçeyn texnologiyalarının ölkədə tətbiq edilməsi imkanları geniş araşdırılmalıdır. Hazırda bununla bağlı nazirliyin dəstəyi ilə bir sıra tədbirlər həyata keçirilir. Nazirliyin fəaliyyət istiqamətlərindən biri də innovativ layihələrə dəstək verməkdir. Ölkədə startapların inkişaf etdirilməsi üçün müxtəlif layihələr, təlimlər təşkil olunur”.
Azərbaycan Mərkəzi Bankının idarə heyətinin sədrinin birinci müavini Alim Quliyev diqqətə çatdırıb ki, müasir dövrdə texnologiyaların inkişafı iqtisadiyyatın bütün sahələrində olduğu kimi maliyyə sektoruna öz təsirini göstərir. Dəyər zənciri daha da mürəkkəbləşir, sektora yeni iştirakçılar daxil olur, nəticədə bank olmayan provayderlərin iştirakı sürətlə artır. Maliyyə texnologiyaları üzrə innovativ həllərin tətbiqinin genişlənməsi dünya miqyasında fintexlərə olan marağı durmadan artırmaqdadır. Qlobal səviyyədə bu gün maliyyə təşkilatlarının 80 faizi fintexlərlə əməkdaşlıq edir. Əgər 2011-ci ildə dünyada fintexlərə investisiyaların həcmi 1,8 milyard dollar idisə, ötən ilin sonuna bu göstərici 30,8 milyard dollara çatıb. Gələcəkdə fintexlərin effektivliyi və səmərəlilik göstəricisi artdıqca investisiyalar da artacaq.
Maliyyə Bazarlarına Nəzarət Palatasının (MBNP) idarə heyəti sədrinin vəzifəsini icra edən İbrahim Alışov qeyd edib ki, cari ilin ilk rübündə banklar 120 milyon manatadək kapital inyeksiyası həyata keçirib. Palatanın fəaliyyəti dövründə bank sektorunda 1,8 milyard manatdan çox kapital inyeksiyası reallaşdırılıb. Bu, bank sektorunun dayanıqlılığının təcəssümüdür. Ölkəmizdə həyata keçirilən dayanıqlı iqtisadi inkişaf, iqtisadi göstəricilərin müşahidə olunan artım tempi, maliyyə bazarları infrastrukturunun sabit fəaliyyəti informasiya texnologiyaları sahəsində, yəni çağırışların bank sisteminə də transformasiyasının sürətləndirilməsinə əlverişli imkan yaradır: "Cari ilin birinci rübündə ölkə üzrə ÜDM-in artımı 3 faiz, qeyri-neft ÜDM-də isə 1,7 faiz artım olub. Üç ayda qeyri-neft məhsullarının ixracı keçən ilin müvafiq dövrü ilə müqayisədə 16,2 faiz artıb. Orta illik inflyasiya bu ilin birinci rübündə 2,1 faiz olub ki, ötən ilin müvafiq dövrü ilə müqayisədə bu rəqəm 4 faizin üzərindədir", - deyə İ.Alışov diqqətə çatdırıb.
İqtisadi İslahatların Təhlili və Kommunikasiya Mərkəzinin (İİTKM) icraçı direktoru, iqtisad elmləri doktoru Vüsal Qasımlı bildirib ki, "Maliyyə xidmətlərinin inkişafına dair Strateji Yol Xəritəsi" və "2018-2020-ci illərdə rəqəmsal ödənişlərin genişləndirilməsi üzrə Dövlət Proqramı" uğurla icra edilir. Problemli kreditlərin həlli, əmanətlərin tam sığortalanması və bankların kapitallaşma səviyyəsinin artırılması istiqamətində işlər görülüb. Bankların fəaliyyəti üzərində nəzarətin təkmilləşdirilməsi və kreditorların hüquqlarını müdafiə mexanizminin təkmilləşdirilməsi üzrə fəaliyyətlər həyata keçirilib: “Aktiv pul bazarının formalaşdırılması məqsədilə beynəlxalq təcrübə araşdırılıb mövcud marketmeykerlərin daha da inkişaf etdirilməsi imkanları qiymətləndirilib. Eyni zamanda, “Bloomberg” ticarət sistemində banklararası pul bazarı əməliyyatlarının aparılması və onlayn rejimdə Mərkəzi Bank tərəfindən bu əməliyyatlarla bağlı məlumatların əldə edilməsi imkanını yaradan "E-Bond" platforması bankların istismarına verilib. Qiymətli kağızlar bazarının dərinləşdirilməsi, paylanılmış reyestr texnologiyalarının tətbiqi, ani ödənişlər sistemi, vençur fəaliyyəti, ödəniş xidmətləri və ödəniş sistemləri istiqamətində təkliflər hazırlanıb. Ölkədə nağdsız ödənişlərin stimullaşdırılması məqsədilə vergi mexanizmi qurulub, rəqəmsal ödənişlər haqqında ictimai məlumatlılığın artırılması məqsədilə fəaliyyətlər həyata keçirilib.
Ölkəmizin maliyyə imkanlarına görə regionun ən vacib ölkəsi olduğunu deyən Azərbaycan Banklar Assosiasiyasının (ABA) prezidenti Zakir Nuriyev isə qeyd edib ki, Azərbaycan regionun bank və maliyyə mərkəzi funksiyalarını artıq öz üzərinə götürüb: “Məhz buna görə də, qabaqcıl texnologiyaların tətbiqinin inkişaf etdirilməsi mühüm məsələdir. Maliyyə və Texnologiyalar Sammitinin növbəti dövrlərdə də illik olaraq keçirilməsi planlaşdırılır. Qarşıdakı dövrdə əsas hədəfimiz bu platformaların inkişaf etdirilməsidir. Azərbaycanda fiziki şəxslərin problemli kreditlərin həllinə dair əlavə tədbirlərlə bağlı Fərman bank və maliyyə sektorunun yeni, dayanıqlı inkişaf mərhələsinə keçməsinə imkan yaradıb. Hazırkı mərhələdə bankların iqtisadiyyatının real sektorunun effektiv kreditləşmələri imkanın genişləndirilməsinə şərait yaradılıb. Bu istiqamətdə görülən əməli işlərin bundan sonra da davam etdirilməsi qarşıda duran ən prioritet məsələlərdən biridir”.
Tədbir çərçivəsində Nəqliyyat, Rabitə və Yüksək Texnologiyalar Nazirliyi, Azərbaycan Mərkəzi Bankı, Maliyyə Bazarlarına Nəzarət Palatası, İqtisadi İslahatların Təhlili və Kommunikasiya Mərkəzi və Azərbaycan Banklar Assosiasiyası arasında qarşılıqlı anlaşma memorandumu imzalanıb. Sənədi Nəqliyyat, Rabitə və Yüksək Texnologiyalar naziri Ramin Quluzadə, AMB-nin sədrinin birinci müavini Alim Quliyev, MBNP-in idarə heyəti sədrinin vəzifəsini icra edən İbrahim Alışov, İİTKM-in icraçı direktoru Vüsal Qasımlı və ABA-nın prezidenti Zakir Nuriyev imzalayıblar.
Sammit panel iclaslarla işini davam etdirib. İclaslarda rəqəmsal transformasiya əsasında müasir bank sisteminə keçid, ödəniş ekosistemində son trendlər və innovativ ödəniş həlləri, rəqəmsal mühitdə informasiya təhlükəsizliyi və digər mövzular müzakirə olunub. Sammit işini mayın 17-də davam etdirəcək.
Bölmənin digər xəbərləri
