BAKIDA TÜRKDİLLİ DÖVLƏTLƏRİN VƏ TOPLULUQLARIN XI DOSTLUQ, QARDAŞLIQ VƏ ƏMƏKDAŞLIQ QURULTAYI KEÇİRİLƏCƏKDİR
AZƏRTAC xəbər verir ki, Azərbaycan Prezidenti İlham Əliyevin təşəbbüsü ilə noyabrın 17-dən 19-dək Bakıda Türkdilli dövlətlərin və topluluqların XI dostluq, qardaşlıq və əməkdaşlıq qurultayı keçiriləcəkdir.
Xarici Ölkələrdə Yaşayan Azərbaycanlılarla İş üzrə Dövlət Komitəsindən bildirmişlər ki, tədbirdən məqsəd türk dövlət və cəmiyyətləri arasında dostluq, qardaşlıq və əməkdaşlıq əlaqələrini inkişaf etdirmək, informasiya mübadiləsini və bir-birilərini daha yaxından tanımalarını təmin etmək, türk mədəniyyətinin zənginliklərinin təbliği, iqtisadi inkişaf sahəsində qarşılıqlı əməkdaşlığı genişləndirən tədbirlər görmək və türk dövlət və cəmiyyətlərinin ümumi problemlərinin həlli yollarını birlikdə araşdırmaqdır.
XI qurultaya Türkiyə, Azərbaycan, Qazaxıstan, Qırğızıstan, Özbəkistan, Türkmənistan, Tacikistan və Monqolustan dövlətləri ilə yanaşı, Rusiya Federasiyasının Altay, Başqırdıstan, Çuvaş, Dağıstan, Qabardin-Balkar, Tatarıstan, Qaraçay-Çərkəz respublikalarında, Ukraynanın Krım vilayətində, Rumıniyada, Bolqarıstanda, Kosovoda və Yunanıstanın Qərbi Trakya bölgəsində yaşayan turkdilli xalqların nümayəndələri, Kumık, Noqay, Şimali Kipr, Qaqauz, mesxeti turklərinin təmsilçiləri qatılacaqlar.
Bundan başqa, Amerika, İdil-Ural, Sibir, Yaxın Şərq, Əfqanıstandakı türk cəmiyyətlərinin nümayəndələri, millət vəkilləri, ictimai birlik və qeyri-hökumət təşkilatlarının, xarici ölkələrdə fəaliyyət göstərən Azərbaycan və türk icmalarının rəhbərləri də tədbirə dəvət olunmuşlar. 30 ölkədən 550-dək nümayəndə və qonağın dəvət olunduğu qurultayın açılışında Azərbaycan Prezidenti İlham Əliyevin, Türkiyənin Baş naziri Rəcəb Tayyib Ərdoğanın, qardaş ölkənin 9-cu Prezidenti Süleyman Dəmirəlin, habelə türkdilli dövlətlərin yüksək dövlət və hökumət nümayəndələrinin iştirakı gözlənilir.
Qurultay çərçivəsində türkdilli xalqlar arasında elm, texnika, mədəniyyət, təhsil, iqtisadiyyat, ticarət, turizm və maliyyə sahələrində əməkdaşlıq, türk dünyasının mədəni irsinin təbliği, türk gəncliyinin qarşısında duran vəzifələr, onların milli ruhda tərbiyə olunması problemləri, müasir qloballaşma proseslərinin xalqlarımızın həyatına təsiri ilə bağlı məsələlər müzakirə ediləcəkdir.
Eyni zamanda, türk dünyasını narahat edən bir sıra digər problemlər - Ermənistan-Azərbaycan, Dağlıq Qarabağ münaqişəsi, Şimali Kipr Türk Respublikasının beynəlxalq təcriddən çıxarılması, İraq və Əfqanıstanda yaşayan türkdilli xalqların vəziyyəti, mesxeti türklərinin öz tarixi torpaqlarına qayıdışı sahəsindəki mövcud çətinliklərlə bağlı fikir mübadiləsi də aparılacaqdır.
Rəsmi açılışdan sonra qurultay işini 6 komissiyada - beynəlxalq əlaqələr, media və informasiya texnologiyaları, İqtisadi, ticarət, maliyyə əlaqələri və turizm, elm, təhsil və texnologiya, cəmiyyətin idarə olunması və hüquq, dil və mədəniyyət və gənclik komissiyalarında davam etdirəcəkdir. Tədbirin sonunda komissiyaların hesabatları dinləniləcək və qurultayın yekun hesabatı qəbul olunacaqdır.
Bundan başqa, qurultayda ABŞ Nümayəndələr Palatası Xarici Əlaqələr Komitəsinin qondarma “erməni soyqırımı” ilə bağlı qətnaməni pisləyən bəyanatın da qəbul edilməsi nəzərdə tutulmuşdur.
1993-cü ildən Türkdilli dövlətlərin və topluluqların dostluq, qardaşlıq və əməkdaşlıq qurultaylarını Türk Dövlət və Cəmiyyətləri Dostluq, Qardaşlıq və Əməkdaşlıq Vəqfi keçirir. Əvvəlki 10 qurultayın hamısı Türkiyədə keçirilmişdir. 2006-cı il sentyabrın 18-20-də Antalyada keçirilən 10-cu qutultayda iştirak edən Azərbaycan Prezidenti İlham Əliyevin təklifi ilə növbəti qurultayın Bakıda keçirilməsi qərara alınmışdır. Beləliklə, ilk dəfədir ki, türkdilli dövlətlərin və topluluqların dostluq, qardaşlıq və əməkdaşlıq qurultayı Türkiyənin hüdudlarından kənarda təşkil olunacaqdır.
Bölmənin digər xəbərləri
