BALAXANI POLİQONUNDA YAŞILLAŞDIRMA İŞLƏRİ DAVAM ETDİRİLİR
Bakı, 31 may (AZƏRTAC). Ölkəmizdə ekoloji tarazlığın bərpası və ətraf mühitin qorunması məqsədi ilə Prezident İlham Əliyev tərəfindən 2010-cu il “Ekologiya ili” elan edilmişdir. Dövlət başçısının tapşırığına uyğun olaraq, “Ekologiya ili” çərçivəsində bir sıra mühüm tədbirlər, həmçinin yaşıllaşdırma kampaniyası keçirilir.
Kampaniya çərçivəsində İqtisadi İnkişaf Nazirliyinin və “Təmiz Şəhər” ASC-nin əməkdaşları Balaxanı şəhər tullantılarının zərərsizləşdirilməsi poliqonu yaxınlığında müxtəlif ağaclar əkmiş, abadlıq işləri aparmışlar. Tədbir çərçivəsində 800-ə yaxın ağac və bəzək kolu əkilmişdir.
Bu, Balaxanı poliqonunda keçirilən ikinci tədbirdir və həmin kampaniyalar zamanı 1200-ə yaxın ağac və bəzək kolu əkilmişdir.
“Ekologiya ili” çərçivəsində belə tədbirlərin gələcəkdə də həyata keçirilməsi nəzərdə tutulmuşdur.
Balaxanı poliqonunda bərk məişət tullantılarının yanma mənbələri tamamilə ləğv edilmiş, zərərli tüstülənmə halları aradan qaldırılmış, daxili yolların böyük hissəsi təmir edilmiş, tullantıların qəbulu üçün meydança və zəruri infrastruktur, qəbul edilən tullantıların həcminin qeydiyyatı sistemi yaradılmışdır.
Bölmənin digər xəbərləri
