İDMAN
“BARSELONA” FİNALIN BİR ADDIMLIĞINDADIR
Mütəxəssislərin əksəriyyəti “Milan” və “Barselona” arasındakı oyunları
“erkən final” adlandırmışlar. Onların fikrincə, klublar finalda görüşsəydi, bu daha ədalətli, maraqlı olardı, lakin püşk belə müəyyən etmişdir.
Gərgin idman mübarizəsi şəraitində keçən görüş isə qonaqların –
“Barselona”nın minimal hesablı qələbəsi ilə (1:0) başa çatmışdır. İtalyanların hücumçuları – Şevçenko və Cilardino oyunun əvvəlində və sonuna yaxın bir neçə əlverişli qol vəziyyətindən istifadə edə bilməmişlər. Görüşün 57-ci dəqiqəsində Ronaldinyodan əla ötürmə alan Frederik Jüli oyunun müqəddəratını həll etmişdir. Hər iki komandanın baş məşqçisinin fikrincə, Barselonadakı oyun da gərgin mübarizə şəraitində keçəcək və heç bir mütəxəssis finala hansı klubun çıxacağını qəti deyə bilməz. Hər halda, həm “Milan”, həm də ”Barselona” finalda oynamağa layiqdir.
Mütəxəssislər isə “Barselona”nın Çempionlar liqası turnirinin 1994-cü ilin finalında “Milan”dan aldığı ağır zərbənin (0:4) əvəzini çıxmağa və tarixində beşinci dəfə finalda oynamağa yaxın olduğunu qeyd etmişlər.