AZƏRTAC-ın Röyter agentliyinə istinadla verdiyi xəbərə görə, Barselona şəhər şurası burada buğa döyüşlərinin keçirilməsini qadağan edən qərar çıxarmışdır. Şəhər şurasının 21 deputatı bu qərarın lehinə, 15-i isə əleyhinə səs vermişdir. Qərarda deyilir ki, korrida müasir mənəviyyat normalarına uyğun olmayan dəhşətli tamaşadır.

Kataloniyanın hakimiyyət orqanları barselonalıların qərarını dəstəkləsə, Barselona İspaniyada korridanın qanundankənar elan edildiyi ilk ispan şəhər olacaqdır.

Barselonada korrida stadionunun meydanında hər il təxminən 100 buğa öldürülür. 1999-cu ildən Kataloniyada uşaqların korrida yarışlarına getməsi qadağan edilmişdir. Bu barədə qərarda deyilir ki, “korrida uşaqlara zorakılıq vərdişi aşılayır”.