Baş direktor: Azərbaycanda qanunvericiliyin müasirləşdirilməsi istiqamətində işlərin aparılması bizi sevindirir VİDEO
Bakı, 30 iyun, AZƏRTAC
İtkin düşmüş şəxslər üzrə Beynəlxalq Komissiya (ICMP) ilkin olaraq keçmiş Yuqoslaviya münaqişəsinin nəticələrinin aradan qaldırılması məqsədilə Lion şəhərində keçirilən G7 sammitində yaradılmışdı. Həmin münaqişə zamanı 160 mindən çox insan həyatını itirdi, 40 min nəfər isə itkin düşdü. Bütün bu illərdən sonra məmnunluqla bildirirəm ki, region hökumətləri tərəfindən itkin düşmüş şəxslərin 75 faizdən çoxunun taleyinə aydınlıq gətirilib və Srebrenitsa soyqırımı zamanı itkin düşənlərin 90 faizdən çoxunun kimliyi müəyyən edilib. Bu, həqiqətən də, möhtəşəm nailiyyətdir və ümid edirik ki, bütün hökumətlər belə bir nəticəyə nail ola bilər.
AZƏRTAC xəbər verir ki, bunu ICMP-nin baş direktoru Katrin Bomberger iyunun 30-da Bakıda “İtkin düşmüş şəxslər məsələsinin həllində müasir yanaşmalar və əməkdaşlığın gücləndirilməsi” mövzusunda keçirilən beynəlxalq konfransda çıxış edərkən deyib.
Təşkilat tərəfindən Azərbaycana göstərilən dəstəkdən danışan Katrin Bomberger bildirib: "Bununla bağlı ilk məsələ əməkdaşlıq, ikincisi isə itkin düşmüş şəxslər məsələsinin həlli üçün müasir mexanizmlərin inkişaf etdirilməsidir.
Əməkdaşlıq məsələsinə gəldikdə isə, ilk növbədə dövlət daxilində əməkdaşlığın olması son dərəcə vacibdir. Azərbaycan nümunəsində görürük ki, bu məsələ ilə məşğul olmaq üçün itkin düşmüş şəxslər üzrə Dövlət Komissiyası yaradılıb və burada bu istiqamətdə fəaliyyət göstərən çoxsaylı dövlət qurumları və nazirliklər təmsil olunur. Fikrimizcə, belə bir institutun mövcudluğu son dərəcə əhəmiyyətlidir və dövlətlərin itkin düşmüş şəxslər məsələsinə necə yanaşmalı olduqlarının mühüm göstəricisidir. Çünki bu məsələ çoxşaxəli xarakter daşıyır və müxtəlif qurumlar arasında sıx əməkdaşlıq tələb edir. Bu baxımdan belə bir əməkdaşlığın mövcudluğunu görmək sevindiricidir.
İkinci vacib məsələ bu səyləri dəstəkləyən qanunvericiliyin mövcud olmasıdır. Azərbaycan kontekstində bizi sevindirən məqamlardan biri də mövcud qanunvericiliyin müasirləşdirilməsi istiqamətində işlərin aparılmasıdır. Bu, bütün dövlətlər üçün vacibdir. Çünki münaqişələrdən və kütləvi itkin düşmə hallarından sonra əksər hallarda dövlətlərin bu problemi həll etmək üçün kifayət qədər hüquqi bazası olmur. Azərbaycanın dəvəti ilə hazırladığımız hesabat və apardığımız qiymətləndirmə göstərir ki, bu sahədə müəyyən irəliləyişlərə ehtiyac var.
Əməkdaşlığın digər mühüm istiqaməti isə Dövlət Komissiyası ilə itkin düşən şəxslərin ailələri arasında əməkdaşlıqdır. Hesab edirəm ki, bu, ən vacib əməkdaşlıq sahəsidir. Hamımıza məlum olduğu kimi, beynəlxalq hüquqa əsasən dövlətlər yalnız itkin düşmüş şəxslərin axtarılması və taleyinin müəyyənləşdirilməsi ilə deyil, eyni zamanda, onların ailələrinin insan hüquqlarının qorunması ilə də bağlı öhdəlik daşıyırlar. Bu ailələrin böyük əksəriyyətini isə əsasən qadınlar və uşaqlar təşkil edir. Onların həqiqəti bilmək, ədalətə nail olmaq və təzminat almaq hüquqları vardır. Buna görə də ailələrin öz hüquqlarını həyata keçirə bilməsi və itkin düşmüş şəxslərin axtarışı prosesində fəal iştirak etməsi çox vacibdir. Üçüncü məsələni isə Azərbaycan ilə Ermənistan arasında görmək olduqca ümidvericidir. Bu iki dövlət arasında olan əməkdaşlıqdır. ICMP-nin mandatı da hökumətlər arasında əməkdaşlığın təmin edilməsindən ibarətdir. Bu konfrans zamanı qeyd olunduğu kimi, sülh istiqamətində atılan addımları məmnunluqla izləyirik".
Bölmənin digər xəbərləri
