Başlıbel faciəsi insanlığın başına gətirilmiş nifrət və qəddarlıq abidəsidir – Rəy
Bakı, 18 aprel, AZƏRTAC
Bu gün Başlıbel qətliamının 30 illiyi qeyd olunur. 2021-ci ilin aprel ayında Başlıbeldə aşkar olunan kütləvi məzarlıq, ötən il Edillidə tapılmış insan sümükləri Ermənistanın Azərbaycan xalqına qarşı törətmiş olduğu qırğınların növbəti bir sübutudur.
Bu sözləri AZƏRTAC-a açıqlamasında “İrəli” İctimai Birliyinin sədri Şahin Rəhmanlı deyib.
Bildirilib ki, 1993-cü ilin aprelində Kəlbəcər rayonunun işğalı zamanı doğma torpaqlarını tərk etməyən 62 nəfər Başlıbel sakini kənd ərazisindəki kahalara sığınıblar. Amma Ermənistan silahlı qüvvələrinə girov düşməmək üçün dağlara sığınan kənd sakinləri cəmi 16 gün gizlində qala biliblər. 1993-cü il aprelin 18-də erməni hərbçiləri qadın, uşaq və yaşlıların gizləndiyi yeri aşkarlayıblar. Başlıbelin işğalı zamanı erməni quldurları tərəfindən 27 nəfər güllələnib. Biz bu faciəni xatırlamaqla həmin cinayəti törədənləri və buna görə məsuliyyət daşımaqda ədalətsiz davrananları ifşa etmək üçün bütün imkanları səfərbər etməliyik. Başlıbel qətliamı dünya ictimaiyyətinin də diqqətini cəlb etməlidir, çünki bu hadisə bütün insanlığın başına gətirilmiş bir nifrət və qəddarlıq abidəsidir. Başlıbel hadisəsi, doğma yurda bağlılıq və fədakarlıq nümunələrindən biridir.
“Baş Assambleyanın 76-cı sessiyasının illik ümumi müzakirələrində çıxışı zamanı Prezident İlham Əliyevin Başlıbel qırğınını xüsusi vurğulaması, kütləvi məzarlıqlar mövzusunu BMT səviyyəsinə qaldırması Ermənistanın dinc azərbaycanlı əhaliyə qarşı törətdiyi müharibə cinayətlərinə görə məsuliyyətdən qaça bilməyəcəyinin, hər bir faktın Azərbaycan dövləti tərəfindən qeydə alınaraq ciddi araşdırılması və beynəlxalq tribunallarda cinayət işlərinin qaldırılmasına vurğu idi.
Şübhəsiz ki, başımıza gətirilmiş bu faciələr xalqımızın birliyini, əzmini, iradəsini, özünə inamını qıra bilmədi. Azərbaycan hər zaman müstəqilliyini möhkəmləndirmək və ərazi bütövlüyünü qorumaq üçün mübarizə apardı. Bu mübarizə şəhidlərimizin canı, qazilərimizin qanı bahasına yekunlaşdı. Lakin son nəticədə Müzəffər Ali Baş Komandanın rəhbərliyi altında qalib Ordumuz 2020-ci ildə 44 günlük Vətən müharibəsində müvəffəqiyyət əldə edərək ərazilərimizi düşmən işğalından azad etdi.
Bu gün biz Azərbaycan xalqı olaraq, Başlıbel qətliamının qurbanlarını xatırlamaqla təkcə həmin hadisəni deyil, müxtəlif vaxtlarda azərbaycanlıların başına gətirilmiş bütün faciələri, soyqırımı qurbanlarını unutmadığımızı göstəririk. Biz sübut etməliyik ki, heç bir cinayət cavabsız qalmayacaq, xalqımıza qarşı törədilmiş bu faciələrin məsuliyyətini daşıyanlar ədalət qarşısında cavab verəcək”, - deyə birliyin sədri qeyd edib.
Bölmənin digər xəbərləri
