BDU-da “Azərbaycan dilinin qorunmasında medianın rolu və vəzifələri” Respublika elmi konfransı
Bakı, 24 aprel, AZƏRTAC
Bakı Dövlət Universitetinin (BDU) Jurnalistika fakültəsinin təşkilatçılığı ilə “Azərbaycan dilinin qorunmasında medianın rolu və vəzifələri” mövzusunda onlayn Respublika elmi konfransı keçirilib.
Universitetdən AZƏRTAC-a bildirilib ki, BDU-nun sosial məsələlər, tələbələrlə iş və ictimaiyyətlə əlaqələr üzrə prorektoru Əliş Ağamirzəyev çıxış edərək müstəqillik dövründə ana dilimizin öz inkişafının yeni mərhələsinə qədəm qoyduğunu qeyd edib. Vurğulayıb ki, milli dövlətçiliyin başlıca rəmzlərindən biri kimi ana dilimiz dövlət dili statusu qazanıb. Bu siyasətin əsası hələ ötən əsrin 60-cı illərindən qoyulub. Ulu öndər Heydər Əliyevin Bakı Dövlət Universitetinin 50 illik yubileyində Azərbaycan dilində çıxışı ana dilimizin dövlət əhəmiyyətli tədbirlərə yol açması, tribunalardan səslənməsi ilə nəticələnib. Ümummilli lider Heydər Əliyevin dövlət dili ilə bağlı bir sıra fərman və sərəncamları dil siyasətinə mühüm töhfə verib.
Ə.Ağamirzəyev bildirib ki, dövlətimizin dil siyasəti bu gün uğurla davam etdirilir. Ölkə rəhbərinin “Azərbaycan dilinin saflığının qorunması və dövlət dilindən istifadənin daha da təkmilləşdirilməsi ilə bağlı tədbirlər haqqında” 2018-ci il 1 noyabr tarixli Fərmanı dövlət dili istiqamətində ardıcıl olaraq aparılan məqsədyönlü siyasətin məntiqi davamı, dilimizə dövlət səviyyəsində göstərilən qayğının daha bir nümunəsidir. BDU-da Azərbaycan dilinin saflığının qorunması və dövlət dilindən istifadənin daha da təkmilləşdirilməsi məqsədilə Tədbirlər Planı həyata keçirilir.
Konfransda Multimedia və elektron kommunikasiya kafedrasının professoru Qulu Məhərrəmli, Yeni media və kommunikasiya nəzəriyyəsi kafedrasının müdiri Cahangir Məmmədli, Multimedia və elektron kommunikasiya kafedrasının müdiri Allahverdi Məmmədli, Beynəlxalq jurnalistika və informasiya siyasəti kafedrasının müdiri Həmid Vəliyev, professor Nəsir Əhmədli, “525-ci qəzet”in baş redaktoru Rəşad Məcid, Mətbuat Şurasının sədr müavini Müşfiq Ələsgərli, “Xalq” qəzetinin əməkdaşı Namiq Məmmədov çıxış edərək ana dilimizin təmizliyinin qorunmasında medianın rolu, kütləvi informasiya vasitələrinin qarşısında duran vəzifələr barədə ətraflı məlumat veriblər.
Konfransda professor-müəllim heyəti, doktorantlar və magistrantlar, respublikanın tanınmış media rəhbərləri iştirak ediblər.
Bölmənin digər xəbərləri
