BDU-nun Qazax filialında infosessiya: “Azərbaycanın rəqəmsal inkişaf strategiyası və Təhsil”
Qazax, 7 mart, AZƏRTAC
Bakı Dövlət Universitetinin Qazax filialında 2026-cı il “Memarlıq və Şəhərsalma İli” çərçivəsində “Azərbaycanın rəqəmsal inkişaf strategiyası və Təhsil” mövzusunda infosessiya keçirilib.
AZƏRTAC-ın bölgə müxbiri xəbər verir ki, filialın Heydər Əliyev auditoriyasında keçirilən tədbirdə bildirilib ki, Azərbaycan yeni tarixi mərhələnin astanasındadır. Bu mərhələ artıq yalnız neft-qaz strategiyası, nəqliyyat dəhlizləri və sənaye parkları ilə ölçülmür. XXI əsrin əsas resursu məlumat, əsas gücü isə süni intellektdir. Danılmaz faktdır ki, texnologiya son onilliklərdə həyatımızın ayrılmaz bir hissəsinə çevrilib. Əvvəllər yalnız sənaye və elm sahələrində istifadə olunan texnoloji yeniliklər indi hər bir insanın gündəlik həyatında mühüm rol oynayır. Smartfonlardan tutmuş, süni intellekt sistemlərinə qədər texnologiya gündəlik qərarlarımızı, iş üsullarımızı və sosial münasibətlərimizi formalaşdırır. İnternetin yayılması ilə birlikdə insanlar artıq məlumat əldə etmək, ünsiyyət qurmaq və əylənmək üçün texnologiyaya müraciət edir. Mobil tətbiqlər və platformalar həyatımızı daha da rahat və səmərəli etməyə kömək edir. Eyni zamanda, texnologiya iş dünyasında, səhiyyədə, təhsildə və nəqliyyatda inqilabi dəyişikliklərə səbəb olur. Bu gün süni intellektin tətbiqi, data mərkəzlərinin yaradılması, rəqəmsallaşma ilə bağlı islahatlar faktiki olaraq ölkələrin gələcək inkişafını müəyyən edir.
Azərbaycanda da bu istiqamətdə müəyyən işlər görülüb, dövlət proqramları qəbul olunaraq icra edilib. Azərbaycan Prezidentinin “Azərbaycan 2020: gələcəyə baxış” İnkişaf Konsepsiyasının təsdiq edilməsi haqqında 9 dekabr 2012-ci il tarixli, “Rəqəmsal inkişaf sahəsində idarəetmənin təkmilləşdirilməsi haqqında” 2021-ci il 27 aprel tarixli, “Azərbaycan Respublikasında Rəqəmsal İnkişaf Konsepsiyası”nın təsdiq edilməsi haqqında 16 yanvar 2025-ci il tarixli fərmanları və “Azərbaycan Respublikasında rəqəmsal iqtisadiyyatın inkişafına dair 2026–2029-cu illər üçün Strategiya”nın təsdiq edilməsi haqqında 10 dekabr 2025-ci il tarixli Sərəncamı bunu deməyə əsas verir. Bundan başqa, Prezident İlham Əliyevin sədrliyi ilə bu il fevralın 11-də keçirilən “Azərbaycanın yeni rəqəmsal arxitekturası” adlı vahid fəaliyyət planına həsr olunmuş müşavirə ölkənin inkişaf modelində keyfiyyətcə yeni istiqaməti müəyyənləşdirdi.
Bu, sadəcə texnoloji yenilənmə deyil, strateji seçimdir. Bütün bu proseslərin mərkəzində insan amili dayanır. Ölkəmizdə təhsil müəssisələrində süni intellektə dair biliklərin aşılanması yalnız proqramlaşdırma öyrətmək demək deyil. Bu, analitik düşüncə, problem həlletmə bacarığı, məlumat təhlükəsizliyi və rəqəmsal etik mədəniyyətin formalaşdırılması deməkdir. Şagird və ya tələbə süni intellektin mahiyyətini, imkanlarını və risklərini anlamalıdır. Bunun üçün müəllim hazırlığı, müasir tədris materialları və təhsil müəssisələrinin texniki təminatı gücləndirilməlidir.
“Təhsildə süni intellektin rolu”, “Süni intellekt: Əmək bazarında yeni eranın başlanğıcı” mövzularında təqdimatlarla çıxışlar olub. Təqdimatlar slaydlar vasitəsilə təqdim olunub.
Müxbir- Ruslan Novruzoğlu
Bölmənin digər xəbərləri
