BEŞQAT OLİMPİYA ÇEMPİONU AKULAYA QALİB GƏLMİŞDİR

20.07.2006 [16:06]
Çap et
A⁺ A^-

AZƏRTAC “Los-Anceles tayms” qəzetinin saytına istinadla xəbər verir ki, üzgüçülük üzrə beşqat olimpiya çempionu Heri Holl (ABŞ) balıq ovlayarkən akulanın hücumuna məruz qalmış, lakin yırtıcıdan canını qurtara bilmişdir. Hadisə iki həftə əvvəl baş versə də, geniş ictimaiyyət ondan yalnız iyulun 18-də bu qəzetdən xəbər tutmuşdur.

Holl və bacısı Bebe Florida ştatı yaxınlığındakı adalardan birinin həndəvərində harpunla sualtı ovla məşğul idilər. Onlar qayıqdan xeyli aralanmışdılar. Bu zaman Holl bir akulanın onlara yaxınlaşdığını görmüşdür. Yırtıcı balıq bir andaca hücuma keçmişdir. Üzgüçü ayağı ilə ona bir neçə zərbə endirdikdən sonra akula Bebeyə tərəf istiqamət almışdır. Qız özünü itirməyərək, harpundan onun başına sərrast “atəş” açmışdır. Bundan sonra yırtıcı balıq aradan çıxmışdır. 35 yaşlı Holl xəsarət almasa da, döyüşün əvvəlində akula onun bacısının qolunu dişləmişdi. Bəxtindən, yara ağır olmamışdır.

Heri Holl ABŞ yığmasının heyətində Atlanta (1996-cı il), Sidney (2000) və Afina (2004) olimpiadalarında beş qızıl medal qazanmışdır. O, çıxışlarını davam etdirir və 2008-ci ildə Pekində keçiriləcək Olimpiadada da yarışmaq niyyətindədir.

BEŞQAT OLİMPİYA ÇEMPİONU AKULAYA QALİB GƏLMİŞDİR

MÜƏLLİFLƏ ƏLAQƏ

Bölmənin digər xəbərləri