BEYNƏLXALQ BİOLOJİ MÜXTƏLİFLİK GÜNÜ QEYD OLUNMUŞDUR
AZƏRTAC-ın müxbiri xəbər verir ki, Azərbaycan Respublikası Milli Məclisinin, Ekologiya və Təbii Sərvətlər, Gənclər, İdman və Turizm, Kənd Təsərrüfatı, Təhsil, Mədəniyyət nazirliklərinin, Milli Elmlər Akademiyası, BMT İnkişaf Proqramı, Dövlət Neft Şirkətinin, qeyri-hökumət təşkilatlarının nümayəndələrinin iştirak etdiyi seminarı AMEA-nın biologiya elmləri bölməsinin rəhbəri, “Biomüxtəliflik üzrə strategiya, fəaliyyət planı” layihəsinin direktoru akademik Musa Musayev açmışdır. O qeyd etmişdir ki, təbii sərvətlərin qorunması və davamlı istifadəsi əsrimizin ən mühüm və qlobal problemlərindən biridir. Təbii sərvətlərin ayrılmaz hissəsi olan bioloji müxtəliflik nəhəng, lakin hələ də tam qiymətləndirilməmiş zəngin ehtiyat mənbəyidir. O, mikroorqanizmlərdən başlamış ən iri heyvanlara və ali bitkilərə qədər bütün formalar və onların məxsus olduğu ekosistemləri əhatə etməklə həyatın mövcudluğunun əsasıdır. Son illər insanların fəaliyyəti nəticəsində ekosistemlər deqradasiyaya uğramış, bir çox növlər isə məhv olmuş və ya onların sayı kəskin şəkildə azalmışdır. Hazırda dünyada 15 milyondan çox canlı növlər mövcuddur və hər gün onların yüzə yaxını bərpa olunmadan məhv olur. Yer kürəsində bioloji müxtəlifliyi yalnız beynəlxalq əməkdaşlıq yolu ilə xilas etmək mümkündür. 1992-ci il mayın 22-də Nayrobi konfransında “Bioloji müxtəliflik haqqında” Konvensiyanın razılaşdırılmış mətni qəbul olunmuşdur. İndi bu Konvensiyaya 180 ölkə və bir regional iqtisadi inteqrasiya təşkilatı qoşulmuşdur. Azərbaycan Respublikasının Milli Məclisi Konvensiyanı 2000-ci ilin mart ayında ratifikasiya etmişdir. BMT tərəfindən 2000-ci ilin dekabrından başlayaraq mayın 22-si Beynəlxalq bioloji müxtəliflik günü kimi qeyd edilir.
Biomüxtəliflik üzrə Konvensiya ilə əlaqələndirici, AMEA Genetik Ehtiyatlar İnstitutunun direktoru Zeynal Əkbərov Konvensiyanın məqsədi, onun yerinə yetirilməsi ilə əlaqədar respublikamızda görülən işlərdən danışmışdır. Qeyd etmişdir ki, sənədin əsas məqsədi bioloji müxtəlifliyin qorunması, ondan sabit istifadə olunması və birlikdə əldə edilən gəlirdən eyni səviyyədə ədalətli faydalanmaqdan ibarətdir. Ölkənin “Bioloji müxtəliflik haqqında” Konvensiya qarşısında götürdüyü öhdəliklərin yerinə yetirilməsi məqsədi ilə Azərbaycan Respublikası Prezidentinin Fərmanı ilə 2001-ci ilin dekabrında Genetik ehtiyatların bioloji müxtəlifliyi üzrə Dövlət Komissiyası yaradılmışdır. Komissiya bioloji müxtəlifliyin tam həcmdə qorunub saxlanması və davamlı istifadəsini təmin etmək məqsədi ilə 2003-cü ildə respublikada beşillik “Biomüxtəlifliyə dair Milli Məruzə, Strategiya və Fəaliyyət Planı” layihəsini hazırlamaq üçün işçi qrupu yaratmışdır.
Təhsil Nazirliyi ekoloji təhsil və təlim mərkəzinin rəhbəri Füzuli Əhmədov, Ekologiya və Təbii Sərvətlər Nazirliyi bioloji sərvətlər və xüsusi mühafizə olunan ərazilər şöbəsinin məsləhətçisi Faiq Sadıqov, bp-nin sağlamlıq, texniki təhlükəsizlik, ətraf mühitin mühafizəsi üzrə direktoru Faiq Əsgərov, Zooloqlar Cəmiyyətinin sədri Sucəddin Quliyev çıxış etmişlər.
Natiqlər əhalinin ekoloji təhsili və maariflənməsinin zəruriliyini xüsusi vurğulamışlar.
Bölmənin digər xəbərləri
