BEYNƏLXALQ OLİMPİYA KOMİTƏSİNİN VİTSE-PREZİDENTİ 2,5 İL MÜDDƏTİNƏ AZADLIQDAN MƏHRUM EDİLMİŞDİR
BOK-un vitse-prezidenti komitənin vəsaitini oğurlamaqda və xeyirlərinə bir neçə qərar qəbul etdiyi idman təşkilatlarının nümayəndələrindən rüşvət almaqda təqsirləndirilir. Məhkəmə qərarında deyilir ki, Kim Un Yon nəzarət etdiyi idman təşkilatlarının fondlarından üç milyon dollardan artıq vəsaiti mənimsəmiş və təxminən 700 min dollar rüşvət almışdır.
Kim Un Yona azadlıqdan məhrum olunmaqdan əlavə, 672 min dollar məbləğində cərimə də kəsilmişdir.
73 yaşlı Kim 30 il Cənubi Koreyada milli idman hərəkatına başçılıq etmişdir. İdmanın taekvondo növundə onun fəaliyyəti xüsusilə diqqətəlayiqdir: o, 70-ci illərdən güləşin bu növü üzrə federasiyaya başçılıq etmiş və onun Olimpiya oyunlarının proqramına salınmasında xüsusi xidmətləri olmuşdur.
Kim Un Yon BOK rəhbərinin müavini kimi dünya idmanında böyük nüfuza malik idi. 1988-ci il Olimpiya oyunlarının Seulda keçirilməsi məhz onun fəaliyyətinin nəticəsidir.
Məhkəmədə ona qarşı sərt ittihamlar irəli sürülmüşdür. Prokurorlar onu idman təşkilatlarını, əslində, öz şəxsi firmalarına çevirməkdə günahlandırmışlar. Hakim isə müttəhimə nisbətən az iş kəsilməsini onun qocalığı və vaxtilə Cənubi Koreyada idmanın inkişafı üçün xeyli iş görməsi ilə izah etmişdir.
Kim əvvəlcə məhkəmə orqanları tərəfindən haqsız təqib olunduğunu bildirmiş, sonra isə səhvini boynuna alsa da, yenə israr etmişdir ki, bu işləri şəxsi mənafeyi üçün yox, öz ölkəsinin mənafeyi naminə görmüşdür. O, hökmlə bağlı apellyasiya qaydası ilə şikayət verəcəyini demişdir.
