Beynəlxalq qrossmeyster Vüqar Həşimovun xatirəsinə həsr olunan beynəlxalq şahmat turniri start götürüb VİDEO
Bakı, 24 iyul, AZƏRTAC
İyulun 24-ü Azərbaycanın məşhur şahmatçısı, mərhum Vüqar Həşimovun doğum günüdür. Beynəlxalq qrossmeyster yaşasaydı, bu gün 32 yaşı tamam olacaqdı.
AZƏRTAC xəbər verir ki, bu münasibətlə iyulun 24-də tanınmış şahmatçı Vüqar Həşimovun xatirəsinə həsr olunan uşaqlar və böyüklər arasında ənənəvi beynəlxalq şahmat turnirinə start verilib.
Turnirin iştirakçıları əvvəlcə ikinci Fəxri xiyabanda Vüqar Həşimovun məzarını ziyarət edərək, onun xatirəsinə dərin ehtiramlarını bildirib, məzarı üzərinə gül dəstələri düzüblər.
Gənclər və idman nazirinin müavini İsmayıl İsmayılov Vüqar Həşimovun keçdiyi həyat yolundan və şahmat yarışlarında qazandığı nailiyyətlərdən danışıb. Azərbaycanda şahmatın inkişafında, istedadlı idmançıların yetişməsində Vüqar Həşimovun mühüm rol oynadığını vurğulayan nazir müavini bildirib ki, şahmatla məşğul olan yeniyetmələr onu özlərinin kumiri hesab edirdilər. Uşaqlar Vüqar kimi yarışlarda uğur qazanıb, ölkəmizi layiqincə təmsil etmək arzusunda olublar. Hazırda Vüqar Həşimov Şahmat Akademiyası uğurla fəaliyyət göstərir və burada uşaqlar idmanın bu qədim növünün sirlərinə yiyələnirlər
“Azərbaycan mötəbər beynəlxalq yarışlara yüksək səviyyədə ev sahibliyi edir. İrimiqyaslı tədbirlər, yarışlar təkcə Bakıda deyil, regionlarda da təşkil olunur. Vüqar Həşimovun xatirəsinə həsr olunan ənənəvi “Shamkir Chess” turnirinə dünyanın ən güclü və reytinqli zəka sahibləri qatılırlar. Dünya çempionu Maqnus Karlsenin bu turnirdə iştirakı superturnirin səviyyəsindən xəbər verir”, - deyə İsmayıl İsmayılov əlavə edib.
Azərbaycan Şahmat Federasiyasının vitse-prezidenti Faiq Həsənov mərhum şahmatçı Vüqar Həşimovun idmançı kimi parlaq nailiyyətləri ilə yanaşı, onun yüksək insani keyfiyyətlərindən də danışıb. Vitse-prezident bildirib ki, Vüqar Həşimov şahmatda qazandığı nailiyyətləri ilə bundan sonra da yaddaşlarda qalacaq. O, ölkəsini sevən, komanda yoldaşları ilə daim mehriban münasibətdə olan və öz biliklərini şahmatçılarla bölüşməkdən çəkinməyən insan idi.
Azərbaycan komandasının ilk dəfə Avropa çempionu olmasında Vüqar Həşimovun inamlı oyunu ilə mühüm rol oynadığını xatırladan Faiq Həsənov onun yoxluğunun ölkə şahmatında hiss edildiyini deyib.
Vüqarın atası Qasım Həşimov açılış mərasimində çıxış edərək turnirin əhəmiyyətindən danışıb, oğlunun xatirəsinə göstərilən ehtirama görə minnətdarlığını bildirib: “Vüqar hər zaman Azərbaycanda uşaqlar arasında beynəlxalq şahmat turnirinin keçirilməsini arzulayırdı. Bu gün siz belə turnirlərdə iştirak etməklə bacarığınızı artırırsınız. Vüqarın xatirə turniri uşaqlar arasında artıq ənənəvi olaraq keçirilir. Vüqarın qısa, lakin şərəfli ömür yolu gənc şahmatçılarımıza nümunə olmalıdır. Bütün iştirakçılara uğurlar arzulayıram. Qoy, güclü qalib gəlsin”.
Əməkdar məşqçi, FIDE arbitri Xanlar Allahverdiyev mərhum şahmatçının xüsusi istedada malik olduğunu diqqətə çatdıraraq deyib: “O, həmişə digər şahmatçılardan fərqlənirdi. Vüqarın şahmata olan tükənməz sevgisini, komanda yoldaşları ilə səmimi dostluq münasibətlərini və nizam-intizamını həmişə yüksək rəğbətlə qarşılamışam. Vüqar Azərbaycanın şahmat tarixində silinməz iz buraxıb”.
Şahmatçı ilə bağlı xatirələrini bölüşən məşqçi Vüqarla ilk oyununu xatırlayaraq onun şahmatın sirlərinə dərindən bələd olduğunu və adının tanınmış şahmatçılarla bir arada çəkildiyini diqqətə çatdırıb.
Çıxışlardan sonra Əməkdar Məşqçi, beynəlxalq usta, yığma komandanın məşqçisi, Vüqar Həşimov Fondunun prezidenti Anar Allahverdiyev turnirin qaydaları barədə məlumat verib.
Sonra Azərbaycan Respublikasının dövlət himni səsləndirilib və beynəlxalq turnir açıq elan olunub. Bildirilib ki, Azərbaycan, Rusiya, Fransa və Birləşmiş Ərəb Əmirliklərindən 10 şahmatçının iştirak etdiyi “A” turniri dairəvi, 60 zəka sahibinin mübarizə apardığı “B” turniri isə İsveçrə sistemi üzrə 9 turdan ibarət olacaq. Avqustun 1-dək davam edəcək mübarizəyə Azərbaycan, dünya və Avropa birinciliklərinin mükafatçıları, beynəlxalq əmsalı 1700-dən yüksək olan şahmatçılar qoşulublar.
Beynəlxalq turnirin reytinq favoriti Azərbaycan şahmatçısı Murad İbrahimlidir.
Bölmənin digər xəbərləri
