Binəqədi rayon İcra hakimiyyəti Xocalı soyqırımının ildönümü ilə bağlı tədbirlər planı hazırlamışdır
Bakı, 15 fevral (AZƏRTAC). Bakının Binəqədi Rayon İcra Hakimiyyəti Xocalı faciəsinin 19-cu ildönümü ilə bağlı tədbirlər planı hazırlamışdır.
Rayon icra hakimiyyətindən AZƏRTAC-a bildirmişlər ki, plana əsasən əvvəlcə Xətai rayonunda Xocalı soyqırımı qurbanlarının xatirəsinə ucaldılmış abidə və Şəhidlər xiyabanı ziyarət ediləcəkdir. Rayonun idarə, təşkilat və müəssisələrində, ali və orta ümumtəhsil məktəblərində Xocalı soyqırımına həsr olunmuş xatirə gecələrinin, “dəyirmi masa”ların, foto-rəsm sərgilərinin keçirilməsi, habelə faciənin dəhşətlərini və Azərbaycan xalqının milli azadlıq uğrunda mübarizəsinə həsr olunmuş sənədli və bədii filmlərin nümayişi nəzərdə tutulmuşdur.
Fevralın 25-də rayonun təhsil müəssisələrində ilk dərs Xocalı soyqırımına həsr olunacaq, fevralın 26-da saat 17.00-da rayon ərazisində faciə qurbanlarının xatirəsi bir dəqiqəlik sükutla yad ediləcəkdir.
Bundan əlavə, Goradil qəsəbəsindəki pansionatda məskunlaşan Xocalı şəhidlərinin ailələrinə humanitar yardım göstəriləcəkdir.
Bölmənin digər xəbərləri
