BMT-NİN BAŞ KATİBİ BEYNƏLXALQ BİOMÜXTƏLİFLİK GÜNÜ İLƏ ƏLAQƏDAR MÜRACİƏT ETMİŞDİR
Bakı, 22 may (Azər TAc). BMT-nin baş katibi Pan Gi Mun Beynəlxalq Biomüxtəliflik Günü münasibətilə müraciətində biomüxtəlifliyin görünməmiş sürətlə itirilməsinə diqqəti yönəltmişdir. Bildirmişdir ki, bu, Yer kürəsində həyatın qorunmasında biosferin qabiliyyətini ciddi surətdə azaldır. Müraciətdə vurğulanır ki, təbii ehtiyatların pisləşməsindən daha çox əhalinin yoxsul təbəqələri və ən kasıb ölkələr zərər çəkirlər. Planetimizin aztəminatlı sakinlərinin 70 faizi kəndlərdə yaşayır və onların gündəlik qidalanması, habelə gəlirləri bilavasitə biomüxtəliflikdən asılıdır.
BMT-nin baş katibi xatırlatmışdır ki, 2002-ci ildə Yohannesburqda keçirilmiş davamlı inkişaf üzrə dünya sammitində ölkə rəhbərləri razılığa gəlmişdilər ki, 2010-cu ilədək biomüxtəlifliyin itirilməsi sürətini xeyli azaldacaqlar. Müraciətdə deyilir: “Həmin vaxt artıq gəlib çatmışdır, lakin təbii ehtiyatlarımızın vəziyyəti sürətlə pisləşməkdə davam edir. Diqqəti bu problemə yönəltmək məqsədi ilə BMT Baş Məclisi 2010-cu ili Beynəlxalq Biomüxtəliflik İli elan etmişdir”. Pan Gi Mun xatırlatmışdır ki, bu ilin ikinci yarısında Baş Məclis həmin problemə həsr olunmuş yüksək səviyyəli xüsusi iclas keçirəcəkdir.
2001-ci ildən başlayaraq hər il mayın 22-də qeyd olunan Beynəlxalq Biomüxtəliflik Günü BMT Baş Məclisi tərəfindən biomüxtəliflik haqqında Konvensiya tərəfdarlarının 1994-cü ildə keçirilmiş Konfransının tövsiyələri əsasında 1995-ci ildə xüsusi qətnamə şəklində elan edilmişdir.
2008-ci il dekabrın 19-da Baş Məclis bütün üzv dövlətləri 2010-cu ildə biomüxtəlifliyin itirilməsi sürətinin xeyli azaldılmasına dair öhdəliklərinə əməl etməyə, özlərinin müvafiq strategiyalarında və proqramlarında bu problemə xüsusi diqqət yetirməyə çağırmışdır. Məclis üzv dövlətlərə yerli xalqların və icmaların nümayəndələri də daxil olmaqla milli komitələrdə, bütün beynəlxalq təşkilatlarda bu hadisəni qeyd etməyi məsləhət görmüşdür. Beynəlxalq Biomüxtəlik ili ilə əlaqədar BMT Baş Məclisi 2010-cu ildə özünün 65-ci sessiyasında dövlət və hökumət başçılarının, nümayəndə heyətlərinin iştirakı ilə yüksək səviyyəli bir günlük müşavirə keçirəcəkdir.
Bölmənin digər xəbərləri
