DÜNYA
BOSNİYADA SÜLHÜN QORUNMASI VƏZİFƏSİ AVROPA BİRLİYİNİN İXTİYARINA VERİLƏCƏK
AZƏRTAC-ın İstanbuldan aldığı xəbərdə deyilir ki, NATO ölkələrinin liderləri Bosniyada sülhün qorunması vəzifəsinin Avropa Birliyinin ixtiyarına verilməsi barədə qərarı bəyənmişlər. Həmin qərara əsasən, sabitləşdirmə qüvvələri (SFOR) cari ilin sonunadək Avropa Birliyi ölkələrinin kontingentləri ilə əvəz ediləcəkdir. Onlara komandanlığı Birliyin xarici siyasət və təhlükəsizlik üzrə ali nümayəndəsinin idarəsi nəzdində yaradılmış və Brüsseldə yerləşən xüsusi qərargah həyata keçirəcəkdir.
SFOR qüvvələrinə NATO 1995-ci ilin axırlarından komandanlıq edir və əməliyyatın başlanğıc mərhələsində bu qüvvələr 60 min nəfərdən ibarət idi. Əməliyyatda NATO ölkələri ilə yanaşı, digər dövlətlərin kontingentləri də iştirak edirdilər. Bosniyada vəziyyətin normallaşması ilə əlaqədar indi SFOR qüvvələri 7 min nəfərə endirilmişdir.
NATO-nun İstanbul zirvə toplantısının qərarında belə bir şərt qoyulmuşdur ki, SFOR-un öz vəzifəsini başa çatdırmasına baxmayaraq, Şimali Atlantika İttifaqı Sarayevodakı qərargahını saxlayacaqdır.