Böyük Britaniyada süddən hazırlanmış bəzi içkilərə şəkər vergisi tətbiq ediləcək
London, 25 noyabr, AZƏRTAC
Böyük Britaniya hökumətinin sabah açıqlanacaq büdcə sənədi ərəfəsində qablaşdırılmış milkşeyk və lattelərin şəkər vergisinə daxil ediləcəyi gözlənilir.
AZƏRTAC BBC-yə istinadla xəbər verir ki, yeni tədbir yalnız hazır qablaşdırılmış içkilərə şamil olunacaq və kafe-restoranlarda hazırlanmış içkiləri əhatə etməyəcək.
Məlumata görə hökumət, həmçinin şəkər vergisinin tətbiq olunduğu həddi aşağı salmağı planlaşdırır ki, bu da daha çox sayda məşhur brendlərə təsir göstərəcək.
Maliyyə naziri Reyçel Rivz büdcə açıqlamasında gənc işçilər üçün minimum əməkhaqqının artırılacağını elan etməyə hazırlaşır. O, həm vergi artımlarının, həm də xərclərin azaldılmasının gündəmdə olduğunu təsdiqləyib, lakin hökumət mənbələrinə görə gəlir vergisi dərəcələri artırılmayacaq. Digər mümkün addımlar arasında elektrik avtomobillərinə yeni vergi və iki uşaq üçün müavinət məhdudiyyətinə dəyişikliklər də nəzərdən keçirilir.
Qablaşdırılmış milkşeyk və lattelərə yeni şəkər vergisinin 2027-ci ilin aprelindən qüvvəyə minməsi planlaşdırılır.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
