Braziliyanın dövlət rəsmisi: İqlim maliyyəsi üzrə Bakı təşəbbüsü qlobal səylərə güclü töhfə verir
Bonn, 20 iyun, Pərvanə Qafarova, AZƏRTAC
COP29 Sədrliyinin İqlim maliyyəsi, investisiya və ticarət üzrə Bakı Təşəbbüsü (BICFIT) investisiyaların stimullaşdırılması potensialına malikdir. Bu təşəbbüs qlobal iqlim maliyyəsinin genişləndirilməsinə töhfə verəcək və Bakıdan Belemə qədər yol xəritəsində nəzərdə tutulan 1,3 trilyon dollarlıq hədəfə çatmaqda mühüm rol oynaya bilər.
AZƏRTAC xəbər verir ki, bu fikirləri xarici işlər nazirinin müavini, COP29-un Baş danışıqçısı Yalçın Rəfiyev BMT-nin İqlim Dəyişmələri üzrə Bonn Konfransı çərçivəsində keçirilən “BICFIT, investisiyaların katalizatoru kimi çıxış edir – o cümlədən Paris Sazişinin 6-cı maddəsinin praktiki tətbiqi vasitəsilə – və Bakıdan Belemə qədər yol xəritəsi çərçivəsində 1,3 trilyon dollarlıq hədəfə töhfə verən platforma” adlı sessiyada deyib.
“BICFIT-i biz COP29 çərçivəsində başladıq. Məqsədimiz maliyyə axınlarını, dayanıqlı investisiyanı və ticarəti iqlim və inkişaf hədəflərimizlə uyğunlaşdırmaq və inteqrasiya etməkdir. BMT-nin Ticarət və İnkişaf üzrə Konfransı (UNCTAD) və BMT-nin İnkişaf Proqramı (UNDP) ilə birgə həyata keçirilən təşəbbüsə COP29 Sədrliyi rəhbərlik edir”, - deyən nazir müavini əlavə edib ki, biz, həmçinin Asiya İnkişaf Bankı da daxil olmaqla, digər beynəlxalq təşkilatlar və maraqlı tərəflərlə əməkdaşlıqdan məmnunuq.
BICFIT məqsədinə uyğun olaraq siyasət formalaşdırılması, bilik mübadiləsi, iqlim investisiyalarının təşviqi və birgə həllərin qurulması üçün qlobal dialoq platforması yaratmağı hədəfləyir. Bu təşəbbüs beş əsas sütun üzərində qurulub və hər biri iqlim maliyyəsi, investisiya və ticarət sahələrinin qovşağında mühüm rol oynayır”, - deyə Yalçın Rəfiyev bildirib.
Sessiyada iqlim maliyyəsinin genişləndirilməsinin çoxtərəfli təşkilatları və özəl sektoru maliyyəyə çıxış imkanlarını artırmağa və effektivliyi yüksəltməyə təşviq etməklə olacağı vurğulanıb.
Eyni zamanda, davamlı institusional əməkdaşlığın qurulmasının strukturlaşdırılmış platforma və müntəzəm keçiriləcək BICFIT Dialoq Konfransı vasitəsilə mümkun olacağı bildirilib.
“BICFIT təşəbbüsünün mərkəzində beynəlxalq əməkdaşlıq dayanır. Biz bütün ölkələrin suverenliyinə hörmətlə yanaşaraq, onların iqlim siyasətlərini öz inkişaf prioritetlərinə və iqlim məqsədlərinə uyğun həyata keçirmələrini dəstəkləyən tərəfdaşlıqları təşviq etmək istəyirik”, - deyə nazir müavini əlavə edib. Deyib ki, bu siyasətlər hər bir ölkənin Milli Səviyyədə Müəyyən Olunmuş Töhfələri (NDC) və Milli Adaptasiya Planı (NAP) çərçivəsində müəyyənləşdiriləcək və Qlobal Yekun Qiymətləndirmə (GST) nəticələri ilə Paris Sazişinin uzunmüddətli məqsədlərinə uyğunlaşdırılacaq. COP29 çərçivəsində BICFIT Dialoquna artan maraq onu göstərir ki, iqlim dəyişikliyi ilə mübarizə və dayanıqlı, inklüziv gələcəyə nail olmaq üçün innovativ siyasət, güclü və uyumlu maliyyə öhdəlikləri, birlik və əməkdaşlıq tələb olunur. Bizim iqlim maliyyəsini inkişaf etdirməyə, investisiya strategiyalarını təkmilləşdirməyə və ticarət siyasətlərini inteqrasiya etməyə yönəlmiş fəaliyyətimiz yüksəksəviyyəli iqlim öhdəlikləri ilə xüsusilə də həssas ölkə və icmalarda hiss edilən nəticələr arasında körpü qurmağa yönəlib.
Braziliya Xarici İşlər Nazirliyində (Itamaraty) iqlim məsələləri üzrə baş danışıqçı Liliam Chagas çıxışında COP29 çərçivəsində başlatdığı Bakı təşəbbüsünə görə Azərbaycanı təqdir etdiklərini bildirib. Deyib ki, Bakı təşəbbüsü iqlim maliyyəsi, investisiyalar və ticarət sahələrində qlobal səylərin gücləndirilməsində mühüm rol oynayır.
O diqqətə çatdırıb ki, inkişaf etməkdə olan ölkələrin iqlim dəyişikliyi ilə mübarizədə maliyyə resurslarına çıxışı məsələsi əsas gündəmdədir. “Biz Bakıda COP29 zamanı qəbul etdiyimiz vacib qərarların nəticələrini indi daha aydın görürük”, – deyə Liliam Chagas vurğulayıb.
L.Chagas Paris Sazişinin 6-cı maddəsinin effektiv istifadəsi ilə investisiyaların cəlb olunmasının mümkünlüyünü və bu çərçivədə ətraf mühitə dair mallar və xidmətlərin dəqiq təriflərinin formalaşdırılmasının əhəmiyyətini xüsusi qeyd edib. “Qeyri-rəsmi və açıq dialoqlar bu yeni ideyaların üstünlüklərini və zəif tərəflərini daha yaxşı dəyərləndirməyə imkan verir”, - deyə o əlavə edib.
Braziliya nümayəndəsi, həmçinin BRICS çərçivəsində atılan yeni addımlar barədə məlumat verib.
Kiçik və Orta Biznesin İnkişafı Agentliyinin (KOBİA) İdarə Heyəti sədrinin müşaviri Elnur Əliyev isə bildirib ki, özəl sektor iqlim dəyişikliyi və iqlim maliyyəsi ilə bağlı qlobal müzakirələrin ayrılmaz hissəsi olmalıdır.
O, bu sektorun bəlkə də ən çox nəzərdən qaçan və laqeyd yanaşılan hissəsini – kiçik və orta biznesi (KOB) təqdim edib. Deyib ki, KOB-lar qlobal çirklənmənin 50 faizinə səbəb olur. Fərqli statistik göstəricilərdən də görünür ki, elektrik və enerji istehlakı, təbii resurslardan istifadə baxımından onlar çox ciddi təsirə malikdir.
“Biz ölkə olaraq ötən il KOB-lar üzrə beynəlxalq səviyyədə birgə prezidentlik funksiyasını yerinə yetirdikdən sonra çox maraqlı bir prosesə – KOB-larla onların “yaşıl keçid”ə baxışı barədə dialoqlara başladıq. Qlobal Cənubun bir hissəsi olaraq, bizim KOB-ların vəziyyəti və imkanları qlobal Şimalla müqayisədə xeyli fərqlidir. Bu məqsədlə 6 ay davam edən bir sorğu keçirdik. Qeyd etmək istərdim ki, ölkənin regionlarında geniş təmsilçiliyimiz var – “KOB dostu” adlandırdığımız təxminən 50 nümayəndə bütün bölgələr üzrə fəaliyyət göstərir və KOB səfirləri kimi çıxış edirlər”, - deyə Elnur Əliyev qeyd edib.
Bölmənin digər xəbərləri
