BRICS+ formatı: Siyasi dialoqu və beynəlxalq əməkdaşlığı gücləndirən platforma
Bakı, 29 oktyabr, AZƏRTAC
Prezident İlham Əliyevin oktyabrın 24-də Kazan şəhərində XVI BRICS Sammitinin “Outreach”/“BRICS+” formatının ilk plenar iclasında çıxışı onun illərlə apardığı dövlət siyasətinin növbəti dəfə bəyanı kimi əlamətdar və dəyərlidir. Azərbaycan Prezidenti hər zaman olduğu kimi bu plenar iclasda da dövləti maraq və hədəflərin istiqamətini açıq şəkildə bildirdi.
Bunu AZƏRTAC-a açıqlamasında Milli Məclisin deputatı Elnarə Akimova söyləyib. O qeyd edib ki, Prezident İlham Əliyev Azərbaycanın bütün dünyada söz sahibi olmasını vurğulayarkən və dövlətə qazandırdığı etimaddan bəhs edərkən konkret faktlardan çıxış etdi. Bunu, ilk növbədə, beynəlxalq münasibətlərdə çoxtərəflilik prinsipi ilə əsaslandırdı. Ölkə rəhbəri uğurlu təcrübə kimi Azərbaycanın Qoşulmama Hərəkatındakı stabil mövqeyini nümunə gətirdi. Əlbəttə, Azərbaycanın Avrasiyanın mühüm nəqliyyat və logistika mərkəzlərindən birinə çevrilməsi, “Şərq-Qərb” və “Şimal-Cənub” nəqliyyat dəhlizlərinin Azərbaycanın ərazisindən keçməsi uğurlu əməkdaşlığın faktları kimi böyük əhəmiyyət kəsb edir. Bu sıraya növbəti ayda COP29-un keçirilməsi də əlavə olunarsa, dövlətimizə olan etimadın səviyyəsi ancaq qürur doğura bilər.
BRICS+ platformasının prinsiplərinin ölkəmizin maraqlarına və Azərbaycan dövlətinin siyasətinə tam uyğunluğunu vurğulayan deputat deyib: “Prezident İlham Əliyev dünyada sülhün bərqərar olması, kosmik nizamın yaradılması, bölgələrdəki münaqişələrin həlli üçün daim konstruktiv yanaşmalar sərgiləyən liderdir. Elə COP29-un keçirilməsi, yaşıl enerji ilə bağlı təşəbbüsləri onun ölkələr arasında dostluq münasibətlərinin qurulmasında, işbirliklərinin güclənməsində nə qədər maraqlı olduğunun sübutudur. Artıq bu böyük tədbirə sayılı günlər qalıb. Bütün bəşəriyyətin iqlim təhlükəsizliyi üçün düşünülmüş bu konfrans həm də Azərbaycanın hekayəsidir. Bunu sülh hekayəsi də adlandırmaq mümkündür. Ona görə yox ki, keçirilmə qərarı 2023-cü ildə oktyabrın 15-də dövlətimizin başçısının Xankəndidə ucaltdığı bayraq təntənəsindən az sonra reallaşıb. Həm də ona görə ki, bu, sülhsevər bir dövlətin və onun rəhbərinin müvafiq istiqamətdə illərlə apardığı işin mənəvi-siyasi gerçəkliyidir”.
E.Akimova onu da vurğulayıb ki, BRICS+ formatı siyasi dialoqu və beynəlxalq əməkdaşlığı gücləndirən platformadır. Onun perspektivləri iqtisadiyyat, səhiyyə, iqlim təhlükəsizliyi və digər məsələlərin həllində mühüm göstəricilər əldə etməyə imkan yarada bilər. Siyasi dialoqun gücləndirilməsi isə ölkələr arasında harmoniyanın stimullaşmasına və dünya miqyasında sülhün bərqərar olmasına mühüm dəstəkdir.
Bölmənin digər xəbərləri
