Bu il Aralıq dənizi ilə Avropaya 186 min qanunsuz mühacir gəlib
Bakı, 29 sentyabr, AZƏRTAC
2023-cü ilin əvvəlindən sentyabrın 24-dək Aralıq dənizi vasitəsilə Avropaya təxminən 186 min qanunsuz mühacir və qaçqın gəlib.
AZƏRTAC xəbər verir ki, Associated Press agentliyi bu barədə BMT Ali komissarının Qaçqınların İşi üzrə İdarəsinə istinadla məlumat yayıb.
Məlumata görə, 2023-cü ildə Aralıq dənizini keçməyə çalışan 2,5 min nəfər həlak olub və ya itkin düşüb. 2022-ci ilin eyni dövrü ərzində bu göstərici 1680 nəfər təşkil edirdi.
Avropaya gələn qanunsuz mühacirlərin böyük hissəsi - 130 min nəfərdən çoxu İtaliyadan keçib. Qaçqınların keçdiyi digər məntəqələr isə Yunanıstan, İspaniya, Kipr və Malta olub. Eyni zamanda, təxminən 31 min nəfər dənizdə aşkarlanaraq Tunisə, 10,6 min nəfər isə Liviyaya geri qaytarılıb.
Qeyd edək ki, 2022-ci il ərzində Aralıq dənizi və Afrikanın şimal-qərb hissəsindəki dəniz yolu ilə Avropaya 159,4 min qaçqın və mühacir gəlib və beləliklə ötən ilin sonunadək Avropada onların sayı 21,9 milyon nəfərə çatıb.
Bölmənin digər xəbərləri
