Cəmiyyətin uğurlu bir azərbaycanlı qadın üçün müəyyən etdiyi çərçivəyə sığmayan arzular…
Tbilisi, 9 iyul, AZƏRTAC
Gürcüstanda yaşayan soydaşlarımız arasında elə gənclər var ki, keyfiyyətli təhsil alaraq qarşısına qoyduğu məqsədlərə çatmaq istəyir. Addım-addım məqsədinə doğru irəliləyir, qarşılaşdığı çətinliklər onu qorxutmur, yolundan çəkindirmir. Gürcüstanda hüquq sahəsində çalışan Tamilla Cəfərova məhz belə gənclərdəndir.
AZƏRTAC-ın xüsusi müxbiri gənc soydaşımızla görüşüb, onun uğurlarının sirrini öyrənib.
Tamilla Cəfərova 1998-ci ildə Gürcüstanın Rustavi şəhərində dünyaya gəlib. Orta məktəbdə əla qiymətlərlə oxuyub, iştirak etdiyi olimpiadalarda qalib olub. Biliyini artırmaq, daha mükəmməl təhsil almaq üçün Rustavidəki türk-gürcü liseyinə imtahan verib. O zaman imtahanda qazandığı yüksək balı və olimpiadadakı uğurunu nəzərə alan məktəb rəhbərliyi ona təhsil haqqının 80 faizini güzəşt ediblər. Bu, Tamillanı daha da həvəsləndirib.
T.Cəfərova məktəbdə oxuyarkən hüquqşünas olmaq istəyib. Səbəbi də maraqlıdır.
“Uşaqlığımdan, Rustavidə keçən günlərimdən qalan və bu gün dünyaya baxışımı tam mənası ilə əks etdirən çox canlı bir xatirə var. 90-cı illərin sonu və 2000-ci illərin əvvəllərində Gürcüstanda böyümək asan deyildi. Resurslar az, qış isə soyuq keçirdi. Tez-tez suyumuz və işığımız kəsilirdi. Hüquqlarımızı isə qoruyan yox idi. Müəyyən vaxtdan sonra atam bizi daimi elektrik enerjisi ilə təmin etmək üçün evə bir generator aldı. İndi geriyə baxanda anlayıram ki, mən hələ o vaxtdan həyatın mənə diktə etdiyi qayda ilə yaşamaq istəmirdim. Ətrafımdakı reallığa öz cavabımı verməyə çalışırdım. Valideynlərimin böyük imkanları və ya zəngin resursları yox idi, lakin mənə öyrətdilər ki, əgər həyatında işıq görmək istəyirsənsə, bəzən o işığı özün gətirməlisən”.
Məktəbi qızıl medalla bitirən Tamilla Tbilisi Dövlət Universitetinin Hüquq fakültəsinə qəbul olur. Universiteti fərqlənmə diplomu bitirən gənc qız magistr təhsilini xaricdə almaq qərarına gəlir. Valideynləri onun bu qərarına hörmətlə yanaşırlar. Beləliklə o, Almaniyada təhsilini davam etdirir. Orada süni intellektin tənzimlənməsi mövzusunda magistr işi yazarkən həyata yenidən və bu dəfə başqa bir prizmadan baxmağı öyrənir.
Bu gün “Borjomi” şirkətində hüquqşünas kimi fəaliyyət göstərən Tamilla Cəfərova, eyni zamanda, Gürcüstan və Avropa İttifaqı miqyasında fəaliyyət göstərən ondan çox şirkətin Məlumatların Mühafizəsi üzrə Müvəkkili (DPO) kimi çalışır, xəstəxanaların, texnologiya şirkətlərinin və təhsil müəssisələrinin hüquqi uyğunluq proseslərini idarə edir. Eyni zamanda, soydaşlarımızın üzləşdiyi problemlərin həllində onlara lazımi köməkliyini də əsirgəmir.
O deyir: “Əgər uğuru ənənəvi meyarlarla ölçsək, mən artıq hədəfimə çatmışam. Lazım olan statuslarım var. Lakin, cəmiyyət bizə çox vaxt uğurlu bir azərbaycanlı qadının necə görünməli, necə danışmalı və nə qədər yüksəlməli olduğuna dair müəyyən bir çərçivə təqdim edir. Uzun müddətdir ki, xarici dünyadan gələn gizli, pıçıltılı bir səs insanımıza potensialımızın etnik mənsubiyyətimiz, cinsimiz və ya gəldiyimiz mühitlə məhdudlaşdığını aşılayır. Mən bununla barışa bilmirəm. Hüququn kağız üzərində və mürəkkəb prosedurlarla necə işlədiyini gördükdə anladım ki, tam qorunmaq üçün bəzən sadəcə qanunlar kifayət etmir. Bəzən gücü sözün əsl mənasında öz əllərinə almalısan. Məhz o an anladım ki, insanları yalnız kağız üzərində qorumaq kifayət etmir. Mən, sadəcə, masa arxasında oturan bir hüquqşünas olmaqdan daha çox, ehtiyacı olan hər kəs üçün canlı bir qalxana çevrilmək istəyirəm. Düşünürəm ki, qismən buna nail olmuşam”.
Deyir ki, rəqəmsal dünya ilə həqiqi dünya arasında bir körpü yaratmaq çoxlarının arzusudur. “Qadınların və cəmiyyətin həssas qruplarının öz daxili güclərini və potensiallarını kəşf etmələrinə kömək etmək istəyirəm. Çünki mübariz və özünə güvənən qadın həm hüquqlarını bilən, həm də öz fiziki məkanını qorumağı bacaran qadındır”, - deyə T.Cəfərova bildirib.
Tamilla Cəfərovanın gələcəyə baxışı və gəncliyə tövsiyəsi də özünəməxsusdur: “Mən stereotiplərin və ya xalqımızın nələrə qadir olduğuna dair bədbin gözləntilərin yükünü çiyinlərində hiss edən gənclərə səslənirəm. Diskriminasiya və şübhələr həqiqi ola bilər, amma onlar mütləq həqiqət deyil. Onlar sadəcə köhnəlmiş ssenarilərdir. O çərçivədən kənara addım atanda siz təkcə öz həyatınızı dəyişmirsiniz, həm də sizdən sonra gələn hər kəsin üfüqünü genişləndirirsiniz”.
Bölmənin digər xəbərləri
