Cənubi Kaliforniya Universitetinin Vaşinqtondakı bölməsində Azərbaycan ilə bağlı tədbir keçirilib
Vaşinqton, 7 fevral, AZƏRTAC
Azərbaycanın ABŞ-dakı səfiri Elin Süleymanov fevralın 6-da Cənubi Kaliforniya Universitetinin Vaşinqtonda fəaliyyət göstərən bölməsində professor-müəllim və tələbə heyəti ilə görüşüb.
Görüşdə “Azərbaycan: Enerji siyasəti və geosiyasət” mövzusunda çıxış edən diplomat ölkəmizin geostrateji mövqeyi, əldə etdiyi tarixi nailiyyətlər və Ermənistan-Azərbaycan, Dağlıq Qarabağ münaqişəsi barədə məlumat verib. Xüsusilə Azərbaycanın dinamik iqtisadi inkişafı, eləcə də enerji, nəqliyyat, informasiya-kommunikasiya texnologiyaları sahəsində ölkəmizin iştirakı ilə həyata keçirilən iri regional layihələr, o cümlədən Bakı-Tbilisi-Ceyhan və Bakı-Tbilisi-Ərzurum boru kəmərləri, “Cənub” qaz dəhlizi, Bakı-Tbilisi-Qars dəmir yolu xətti, Trans-Avrasiya Super İnformasiya Magistralı layihələri haqqında məlumatlar görüş iştirakçılarının diqqətinə çatdırılıb.
Azərbaycanın regionda etibarlı tərəfdaş olduğunu qeyd edən diplomat vurğulayıb ki, respublikamız, həmçinin bölgədə müstəqil siyasət yürüdən, beynəlxalq hüquqa riayət edən, heç bir dövlətin daxili işlərinə qarışmayan, özünü təmin etmək imkanında olan, bərabərhüquqlu tərəfdaşlığa üstünlük verən ölkədir. Səfir bildirib ki, bir tərəfdən Avrasiya məkanında baş verən proseslər, digər tərəfdən isə ölkəmizin son iki dekadada keçdiyi sürətli inkişaf sübut edir ki, Azərbaycan xalqının ümummilli lideri Heydər Əliyevin vaxtında qəbul etdiyi qərarlar strateji yanaşma və uzaqgörənliyi ilə fərqlənir.
Diqqətə çatdırılıb ki, Xəzərin zəngin karbohidrogen ehtiyatlarının dünya bazarlarına çıxarılmasını təmin edən “Əsrin müqaviləsi”nin imzalanmasından 20 il sonra Azərbaycan Prezidenti İlham Əliyevin təşəbbüskarı olduğu “Cənub” qaz dəhlizi layihəsinin həyata keçirilməsi regional enerji təhlükəsizliyinin gücləndirilməsi ilə yanaşı, bölgənin ümumi siyasi transformasiyasına, əməkdaşlığın daha da dərinləşməsinə böyük təkan verib. Bunun nəticəsi olaraq, Azərbaycan Cənubi Avropanın yeni coğrafiyasının formalaşmasının müəllifinə çevrilib. Eyni zamanda, Azərbaycan Bakı-Supsa kəməri ilə Qara dəniz regionuna, Bakı-Tbilisi-Ceyhan kəməri ilə isə Aralıq dənizi regionuna çıxıb. “Cənub” qaz dəhlizi vasitəsilə isə Xəzər, Qara, Aralıq və Adriatik dənizləri məkanı yaradılıb. Hətta Gürcüstan da Bakı-Tbilisi-Ceyhan kəməri ilə isə Aralıq dənizi regionuna çıxış imkanı əldə edib.
Bildirilib ki, Azərbaycan müstəqilliyin məsuliyyətini tam anlayaraq özünün inkişafı ilə yanaşı, regionun digər ölkələrinin də tərəqqisinə töhfə verir. Bu xüsusiyyət regionda lider ölkələrə məxsus mövqeyi əks etdirir.
Azərbaycanlı diplomat təəssüflə qeyd edib ki, yürütdüyü yanlış siyasət nəticəsində regiondakı inkişaf proseslərindən kənarda qalan Ermənistan 20 ildən artıqdır, müstəqil dövlət kimi davrana bilmir. Bu isə rəsmi Yerevanın öz xalqının gələcəyini düşündüyünü şübhə altına alır.
E.Süleymanov son vaxtlar Şərqi Avropada, eləcə də Yaxın Şərqdə baş verən münaqişələrin yenidən kəskinləşməsinə toxunaraq böyük dövlətlərin bu problemlərə daha məsuliyyətli yanaşmasının vacibliyini bildirib. O, qeyd edib ki, sabitlik və inkişaf olmayan yerlərdə radikallaşma meyilləri daha çox nəzərə çarpır. Bu baxımdan Qərb dövlətləri, o cümlədən rəsmi Vaşinqton tərəfindən strateji, düşünülmüş və mövcud reallıqları nəzərə alan yanaşma əhəmiyyətlidir.
Yusif Babanlı
AZƏRTAC-ın xüsusi müxbiri
Vaşinqton
Bölmənin digər xəbərləri
