Cənubi Koreyada nazir koronavirus səbəbindən karantinə alınıb
Pekin, 16 mart, AZƏRTAC
Cənubi Koreyanın Okean və Balıqçılıq naziri Mun Sonq-hyek yeni tip koronavirus (COVID-19) şübhəsi ilə öz evində karantinə alınıb.
AZƏRTAC Yonhap agentliyinə istinadla xəbər verir ki, nazirin Secon şəhərində yerləşən hökumət kompleksində təmasda olduğu şəxslərdən birinin koronavirusa yoluxması təsdiqləndikdən sonra onun martın 24-dək karantində qalması barədə qərar qəbul olunub. Hazırda nazir öz evində onlayn şəkildə işini davam etdirir.
Qeyd edək ki, Cənubi Koreyanın Okean və Balıqçılıq Nazirliyi paytaxt Seuldan 130 kilometr cənubdakı Secon şəhərində hökumət kompleksində yerləşir. Dünyada koronavirusa yoluxanların sayına görə Çin, İtaliya, İran və İspaniyanın ardından 5-ci olan Cənubi Koreyanın hökumət kompleksində 29 nəfərin virusa yoluxması təsdiqlənib. Bundan sonra Okean və Balıqçılı naziri ilə yanaşı, 292 dövlət qulluqçusunun da karantinə alınmasına qərar verilib.
Cənubi Koreyada indiyədək 8236 nəfərin koronavirusa yoluxması təsdiqlənib. Virus səbəbindən ölənlərin sayı isə 75 nəfərdir.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
