Ceyhun Dadaşov: Bugünkü gənclər sabahkı yetkin tamaşaçılarımızdır
Bakı, 7 noyabr, Anara Axundova, AZƏRTAC
AZƏRTAC teatr sahəsinin nümayəndələri ilə silsilə müsahibələri davam etdirir. Azərbaycan Dövlət Pantomima Teatrının quruluşçu rejissoru Ceyhun Dadaşov öz teatrının əsas tamaşaçıları və bu gün teatrda müşahidə olunan yeniliklər barədə danışıb.
“Pantomima teatrına həm gənc, həm də yetkin tamaşaçılar gəlir. Lakin gənclər bizə daha çox meyillidirlər. Bu, sevindirici haldır, çünki bugünkü gənclər sabahkı yetkin tamaşaçılardır.
Teatrımız digər teatrlardan forma baxımından fərqləndiyindən, janrından asılı olmayaraq özünəməxsus üsluba malikdir və tamaşaçılarımızı janrın özü deyil, tamaşalarımızı təqdim etdiyimiz forma cəlb edir”, - deyə rejissor qeyd edib.
Həmsöhbətimizin sözlərinə görə, hazırda qlobal trend teatrların tamaşalarında daha çox hərəkətlilik nümayiş etdirməsidir.
“Bəlkə də bu, təbii bir prosesdir. Hamı teatrın audiovizual sənət növü olduğunu anlayır. Yeniliklərə gəldikdə isə teatrlar getdikcə daha müasir texnologiyalardan - digər sahələrdə istifadə olunan texnologiyalardan istifadə edirlər. Bu texnologiyaların hamısı hələlik Azərbaycan teatrında mövcud deyil. Amma o, bu istiqamətdə də inkişaf edir”, - deyə C.Dadaşov vurğulayıb.
Bölmənin digər xəbərləri
