QAN YADDAŞI
ÇEXİYADA AZƏRBAYCANLI TƏLƏBƏLƏRİN PRAQA FORUMU İŞƏ BAŞLAMIŞDIR
Xarici Ölkələrdə Yaşayan Azərbaycanlılarla İş üzrə Dövlət Komitəsindən AZƏRTAC-a bildirmişlər ki, fevralın 27-də Çexiya Respublikasında azərbaycanlı tələbələrin ikigünlük Praqa Forumu işə başlamışdır. Forumun açılışı Çexiya Senatının rəsmi iclas zalında olmuşdur.
Tədbir Azəri-Çex Cəmiyyətinin təşkilatçılığı, Çexiya Senatının və Azərbaycanın bu ölkədəki səfirliyinin dəstəyi ilə keçirilir.
Dövlət Komitəsi əməkdaşlarının da qatıldıqları tədbir çərçivəsində Xocalı soyqırımının 16-cı ildönümü ilə bağlı yürüş keçiriləcəkdir.
Bundan əlavə, forumda “Çexiyada Pulsuz Təhsil“ layihəsinin və bu mövzuda saytın təqdimatı olacaqdır.
Fevralın 28-də işini davam etdirəcək forumun proqramına lobbiçilik mövzusunda dəyirmi masa, Xrudim şəhərində Azərbaycan-Ermənistan komandaları arasında futzal oyununun izlənməsi daxildir.