Çexiyada növbəti parlament seçkiləri oktyabrın 3-4-də keçiriləcək
Praqa, 15 may, AZƏRTAC
Bu il Çexiyada parlament seçkiləri 3-4 oktyabr tarixlərində keçiriləcək.
AZƏRTAC xəbər verir ki, Prezident Pyotr Pavelin bununla bağlı qərarı bu gün rəsmi Qanunlar Toplusunda dərc olunub. Bununla da seçki kampaniyası rəsmən başlamış sayılır və bu, partiyalar, hərəkatlar və onların koalisiyaları üçün müəyyən öhdəliklər yaradır. Onların bütün təşviqat fəaliyyəti qanunla müəyyən olunmuş 90 milyon kron (3,6 milyon avro) məbləğindəki limit çərçivəsində aparılmalıdır.
Mayın 15-dən başlayaraq beş gün ərzində, yəni mayın 19-dək seçkilərdə iştirak edəcək birliklər şəffaf seçki hesabı açmalı və həmin hesaba internet saytlarında ictimaiyyətin çıxışını təmin etməlidirlər. Həmçinin bu hesaba Siyasi Partiyalar və Hərəkatların Maliyyə Nəzarəti İdarəsinin çıxışı da təmin olunmalıdır.
Çexiyanın Daxili İşlər Nazirliyi öz saytında qarşıda gələn parlament seçkiləri ilə bağlı məlumat yayıb ki, seçkilərin təhlükəsiz və etibarlı şəkildə keçirilməsi üzərində fəal şəkildə çalışılır. Kibertəhlükəsizliyin təmin olunması məqsədilə xüsusi texniki bölmə yaradılıb. Bu bölmə informasiya sistemlərinə gücləndirilmiş nəzarət, seçkilərlə bağlı veb-saytların monitorinqi, eləcə də kommunikasiyalarda nasazlıq hallarının baş verə biləcəyinə hazırlığın görülməsi üzrə fəaliyyət göstərir.
Praqa
Bölmənin digər xəbərləri
