CİNAYƏT İŞİNİN İCRAATINA XİTAM VERİLMİŞDİR
Həmin faktla bağlı 2005-ci il avqustun 31-də Azərbaycan Respublikası Baş Prokurorluğu tərəfindən CM-in özünü öldürmə həddinə çatdırmaya görə məsuliyyət nəzərdə tutan 125-ci maddəsi ilə cinayət işi başlanmışdır.
Hadisə yerinə baxış keçirilərkən M.Əliyevin meyiti yataq otağında olan çarpayının üzərində uzanmış halda, ağız nahiyəsində odlu silahdan açılmış atəş nəticəsində ölmüş vəziyyətdə aşkar edilmişdir. Eyni zamanda hadisə yerindən içərisində 3 ədəd tamlığı pozulmamış və 1 ədəd istifadə olunmuş patronlar olan “Vinçester” tipli tüfəng və döşəmədə 2 ədəd patron aşkar edilərək götürülmüşdür. Həmin silah və patronlar məhkəmə-ballistik ekspertizasına təqdim edilmişdir.
Məhkəmə-ballistik ekspertizasının 2005-ci il 22 sentyabr tarixli rəyi ilə müəyyən edilmişdir ki, həmin silah zavod üsulu ilə hazırlanmış “Vinçester” sistemli “88” modelli, daxili çaxmaxlı, hamar təklüləli odlu ov tüfəngidir, texniki cəhətdən saz, atəş açmaq üçün yararlıdır, 1 ədəd giliz zavod üsulu ilə hazırlanmış və təqdim olunmuş tüfəngdən atılmışdır.
Bundan başqa, hadisə yerindən M.Əliyev tərəfindən ailəsinə yazılmış məktub aşkar edilərək götürülmüşdür. Məktubun mətnindən görünür ki, M.Əliyevin peşə və maliyyə məsələləri ilə bağlı, həmçinin ailədə hər-hansı bir problemləri olmamış, o, öz psixi durumunu və ailəsi qarşısında mənəvi əziyyət çəkdiyini nəzərə alaraq, gələcəkdə əsəb xəstəsi olarsa ailə üzvlərinə əziyyət verəcəyini düşünərək intihar etmişdir.
Kütləvi informasiya vasitələrində dərc olunan məqalələrdə M.Əliyevin ölümünün səbəbi barədə müxtəlif fərziyyələr, o cümlədən ölümün əsas səbəblərindən birinin də onun peşə fəaliyyəti ilə əlaqəli olması fərziyyəsi irəli sürülmüşdür.
Lakin istintaq zamanı həmin fərziyyələr öz təsdiqini tapmamışdır. Əksinə, M.Əliyev daxili işlər orqanlarında işlədiyi dövrdə özünü peşəkar polis işçisi kimi göstərmiş, yaxşı xidmətinə görə irəli çəkilmiş, dəfələrlə rəhbərlik tərəfindən mükafatlandırılmış, 1998-ci ildə isə “Azərbaycan Bayrağı” ordeni ilə təltif edilmişdir.
İstintaq zamanı M.Əliyevin peşə fəaliyyəti, maliyyə məsələləri və ya başqa bir səbəbdən hər-hansı şəxslər tərəfindən özünü öldürmə həddinə çatdırılması və ya onun digər şəxslər tərəfindən öldürülməsi faktı öz təsdiqini tapmamışdır. Müəyyən edilmişdir ki, 2005-ci il avqustun 31-də M.Əliyev yaşadığı mənzildə intihar etmiş və həmin intiharın səbəblərinə əsas səhhətində əsəb durumu ilə bağlı yaranmış problemlərin olması, gələcəkdə həmin xəstəliyin daha ağır formasına tutulması və bununla bağlı ailə üzvlərinə hər-hansı əziyyətləri vermək istəməməsi, həmçinin həyat yoldaşının zob xəstəliyinə tutulmasında özünü günahkar bilərək mənəvi cəhətdən əziyyət çəkməsi olmuşdur.
İstintaqın gəldiyi nəticəyə görə, M.Əliyevin ölümündə cinayət tərkibi olmadığından cinayət işinin icraatına 2005-ci il noyabrın 30-da xitam verilmişdir.
Bölmənin digər xəbərləri
