Bakı, 22 noyabr, AZƏRTAC

COP29-un hədəflərindən biri ətraf mühitə təsir göstərən dekarbonizasiya prosesini sürətləndirmək - alternativ enerjidən istifadə etməklə karbon qazı və istilik effekti yaradan qazların azaldılması, hətta onun minimuma - 0 səviyyəsinə endirilməsi, yaşıl iqtisadiyyatın inkişafı və innovativ-elmi yanaşmanın təşviqidir. Eyni zamanda, gənclər və həssas qrupa daxil olan qrupların iqlim dəyişikliklərinin fəsadlarından qorunması üzrə mümkün tədbirlərin həyata keçirilməsi, yeni yaşıllıq zonalarının yaradılmasıdır.

Bu fikirləri AZƏRTAC-a məxsusi açıqlamasında Dövlət Ekoloji Ekspertiza Agentliyinin İdarə Heyətinin sədri Mirsalam Qənbərov deyib.

Cəmiyyətin ekoloji maarifləndirilməsində dövlət və özəl sektorun məsuliyyətindən danışan agentlik rəhbəri bildirib ki, ekologiya ilə bağlı bütün ideyaların kökündə insan təfəkkürü dayanır. Ekoloji məsələləri diqqətə alınan COP29 konfransının Bakıda keçirilməsi fərdlərin bu istiqamətdə maariflənməsinə təkan verəcək: “İnsanlar anlamalıdırlar ki, əgər sağlam yaşamaq istəyirlərsə, ətraf mühitin qorunmasına həssas yanaşmalıdırlar. Hər kəs tullantıları qanunvericiliyin tələbinə uyğun idarə etməyi bacarmalıdır. Ekoloji şüurun formalaşmasında inzibati tədbirlərdən daha çox müəyyən normalara riayət edilməsi dayanır”.

Ekoloji təşəbbüs və layihələrin əhəmiyyətindən bəhs edən müsahibimiz bildirib ki, burada suya, elektrik enerjisinə qənaət, alternativ enerji mənbələrindən istifadə, ən başlıcası formalaşan tullantı sularının təkrar emalı, yağış sularından səmərəli istifadə edilməsi kimi məqamlar nəzərə alınmalıdır. Bu işdə dövlət-özəl sektor əməkdaşlığı mühüm rol oynayır. Hər bir fərd, ictimai qurum, layihəni həyata keçirən təşkilat bu məsələlərdə öhdəlik götürməlidir.

Bu günlərdə dünyanın diqqətinin Azərbaycanda olduğunu deyən Agentliyinin İdarə Heyətinin sədri bildirib ki, ekoloji problemlərin həlli istiqamətində mütəxəssislərin rəyi nəzərə alınarsa, bunun özü irəliləyiş deməkdir.