DÜNYA
Cozef Bayden prezident seçkilərinin təxirə salına biləcəyindən ehtiyatlanır
![Cozef Bayden prezident seçkilərinin təxirə salına biləcəyindən ehtiyatlanır](/files/2020/1/1200x630/1587732520330231683_1200x630.jpg)
Bakı, 24 aprel, AZƏRTAC
Demokratlar partiyasından prezident postuna namizədliyinin irəli sürülməsinə çalışan ABŞ-ın sabiq vitse-prezidenti Cozef Bayden Ağ evin sahibi Donald Trampın COVID-19 pandemiyası ilə bağlı vəziyyətdən istifadə edərək noyabr ayında nəzərdə tutulan seçkiləri təxirə sala biləcəyindən ehtiyatlanır.
AZƏRTAC bu barədə CBS telekompaniyasına istinadla xəbər verir.
“Mən hesab edirəm ki, Donald Tramp hər hansı bir yolla seçkiləri təxirə salmağa və baş tutmaması üçün bəhanə axtarmağa hazırlaşır. O, elə hesab edir ki, bu, qələbə qazanmaq üçün yeganə vasitədir”, - deyə Cozef Bayden tərəfdarları ilə online görüşdə bildirib.
CNN telekompaniyası isə öz növbəsində qeyd edir ki, Donald Tramp seçkilərin təxirə salınması ilə bağlı qərarı təkbaşına verə bilməz, çünki qanuna görə, bunun üçün ABŞ Konqresinin dəstəyi lazımdır. Bununla yanaşı, ABŞ Prezidenti aprelin 4-də Ağ evdə keçirdiyi brifinqdə deyib ki, pandemiyaya baxmayaraq ölkədə prezident seçkiləri planlaşdırıldığı kimi noyabrın 3-də keçiriləcək. O, səsvermənin poçt vasitəsi ilə keçirilməsi barədə demokratların təklif etdiyi variantı da sərt tənqid edib.
Qeyd edək ki, Demokratlar partiyasının rəhbərliyi iyulun 13-də Viskonsin ştatının Miluoki şəhərində keçirilməsi planlaşdırılan partiya qurultayını pandemiya ilə əlaqədar avqustun ortalarınadək təxirə salıb. Hazırda Cozef Bayden demək olar ki, partiyadan prezident seçkilərinə irəli sürülə biləcək yeganə namizəddir. Onun əsas rəqibi - Vermont ştatından olan senator Berni Sanders aprelin 8-də seçki yarışından çəkildiyini elan edib.