DAŞ SALAHLI BENTONİT EMALI ZAVODUNUN BİRİNCİ MƏRHƏLƏSİ İŞƏ SALINMIŞDIR
Azərbaycan Prezidenti İlham Əliyev mayın 30-da Daş Salahlı kəndində inşa olunan Bentonit emalı zavoduna gəldi. Dövlətimizin başçısını burada böyük hörmətlə qarşıladılar.
“Azrosprominvest” Azərbaycan-Rusiya birgə müəssisəsinin bu zavodu “Daş Salahlı Bentonit” Açıq Səhmdar Cəmiyyətinin müəssisəsinin bazasında yaradılmışdır. Daş Salahlı bentonit müəssisəsinin əsası ötən əsrin 70-ci illərində ulu öndər Heydər Əliyev tərəfindən qoyulmuşdur. O vaxt SSRİ-nin bu məhsula olan tələbatını, əsasən, bu mədən təmin edirdi və müxtəlif ünvanlara ildə 800 min ton məhsul göndərilirdi. SSRİ-nin süqutundan sonra isə fəaliyyətini dayandırmışdı. Bu müəssisəyə ikinci həyat Prezident İlham Əliyev tərəfindən verilmişdir. Hazırda burada 83 milyon ton xammal ehtiyatı vardır. “Şimal” karxanası gələcək nəsillər üçün qorunub saxlanılacaqdır. “Gəmi” və “Mərkəzi” karxanaları isə 25 illiyə istifadəyə veriləcəkdir. Həmin müddətdə gündə 25 min ton məhsul istehsal olunub ixrac ediləcəkdir. Əsas bazar Rusiya olacaqdır. Bu tipli müəssisə Türkmənistan və Gürcüstanda da vardır. Bu il Rusiyaya 70 min ton məhsul satılacaqdır.
Prezident İlham Əliyev “Azrosprominvest” birgə müəssisəsinin göstəriciləri ilə də tanış oldu. Bildirildi ki, 
“Azrosprominvest” Rusiyanın “Bentonit” Elm-İstehsalat Birliyi və Azərbaycanın “Daş Salahlı Bentonit” Səhmdar Cəmiyyəti arasında bağlanmış icarə müqaviləsi əsasında yaradılmışdır. Müəssisənin əsas məqsədi metallurgiya, neft, qaz, ətriyyat, maşınqayırma və digər sənaye sahələrində istifadə olunan yüksək keyfiyyətli bentonit gili emal etmək və Avropa bazarında layiqli mövqe tutmaqdır. Müəssisənin elan olunmuş nizamnamə fondu 12 milyon ABŞ dollarıdır, o cümlədən Rusiya tərəfindən birbaşa investisiyaları 6 milyon ABŞ dolları təşkil edəcəkdir. Hazırda sərf olunan birbaşa investisiyaların məbləği 2,9 milyon ABŞ dolları təşkil edir.
Zavodun inşasında ən müasir texnologiya tətbiq olunacaq, avadanlıq Almaniya, Rusiya, Ukraynadan gətiriləcəkdir.
Hazırda zavodda 120 nəfər çalışır. 2008-ci ilin mayında tam istifadəyə veriləndən sonra 250 nəfər işlə təmin ediləcəkdir. İşçilər gündə bir dəfə pulsuz yeməklə təmin olunur, zavoda məxsus nəqliyyat vasitəsilə işdən evə çatdırılırlar. İşçilərin ixtisasının artırılması üçün mütəmadi kurslar təşkil edilir. Bu zavod dünyada analoqu olmayan yeganə profilli müəssisədir.
Prezident İlham Əliyev zavodun birinci mərhələsinin işə düşməsini bildirən düyməni basdı və müəssisə işə düşdü. Dövlətimizin başçısı kollektivə öz xeyir-duasını verdi və gələcək fəaliyyətlərində uğurlar arzuladı.
Bölmənin digər xəbərləri
