DAŞKƏNDDƏKİ MİLLİ MƏDƏNİYYƏT MƏRKƏZLƏRİ NOVRUZ ŞƏNLİYİ KEÇİRMİŞLƏR
Daşkənd, 28 mart (AZƏRTAC). Daşkənddəki Beynəlmiləl Mədəniyyət Mərkəzi paytaxtda fəaliyyət göstərən milli mədəniyyət mərkəzləri ilə birgə böyük bayram şənliyi keçirmişdir.
Tədbirdə Azərbaycan diasporunun çoxsaylı üzvləri də iştirak etmişlər.
Babur adına parkda Azərbaycan, axıska türkləri, qazax, qızğız, türkmən, tacik, uyğur və digər xalqların nümayəndələri üçün ayrıca guşələr yaradılmış, bu xalqların ədəbiyyatı, mədəniyyəti, tarixindən bəhs edən kitablar, jurnallar nümayiş etdirilmiş, iştirakçılara Novruz adət-ənələri ilə bağlı məlumatlar verilmişdir.
Beynəlmiləl Mədəniyyət Mərkəzinin sədri Nəsrəddin Məhəmmədiyev iştirakçıları salamlamış, Özbəkistanda yaşayan azsaylı xalqlara yaradılmış yüksək şəraitdən danışmışdır.
Azərbaycan guşəsinə gələnlər milli mətbəximizin ləziz yeməklərinin, həmçinin şəkərbura, paxlava, qoğal və digər şirniyyatlarımızın dadına baxmışlar.
“Azəri qızları” uşaq rəqs ansamblı bir-birindən gözəl rəqslərimizi ifa etmişlər.
Qulu Kəngərli
AZƏRTAC-ın xüsusi müxbiri
Daşkənd
Bölmənin digər xəbərləri
