Daşkəsənə yağan aramsız qar rayonda problem yaratmır
Daşkəsən, 17 dekabr (AZƏRTAC). Dağlıq ərazidə yerləşən Daşkəsənə yağan aramsız qar rayonun həyat ritminə elə bir mənfi təsir göstərməmişdir.
Rayon 22 nömrəli yol-istismar idarəsindən AZƏRTAC-a verilən məlumata əsasən, əraziyə qar yağan andan müəssisə gücləndirilmiş iş rejiminə keçmişdir. İdarənin nəzarətində olan 283 kilometr, o cümlədən 36 kilometr respublika əhəmiyyətli yollarda hərəkətin ahəngdarlığını təmin etmək məqsədilə hər il ciddi hazırlıq işləri görülür. Elə bu məqsədlə yay aylarında 60 ton duz, 1000 ton qum, 6 ton dizel yanacağı, 3 ton isə benzin tədarük edilmiş, 2 qreyder, 2 ekskovator və 2 buldozer saz vəziyyətə gətirilmişdir.
Hazırda bu texnikalar yolların təmizlənməsinə cəlb edilmişdir. Həyata keçirilən tədbirlərin nəticəsidir ki, rayondakı 13 körpü və digər ərazilər nəqliyyatın tam maneəsiz hərəkəti üçün açıqdır. Adətən qış aylarında gediş-gəliş çətin olan Xoşbulaq, Astav, Zağalı və Kollu kəndlərinə gedən yolların təmizlənməsi daha çox diqqət mərkəzində saxlanılır.
Bölmənin digər xəbərləri
